洪禮賢講馬YIN''''S TALK：馬圈眼見未為真

魑魅魍魉

　　耳聽三分假，眼見未為真！放喺好多地方都啱用，像張三李四在街上閒聊，張：「好靚女呀，前面嗰個！」

　　李：「靚成點呀？」張：「剩係背影都殺死人！」

　　李：「唔信， 行前睇埋個樣先。」

　　張：「睇完覺得Ｏ嘞啩！」

　　李：「係呀....後面似幅畫，前面炸豬扒！」

　　聽人講嘢要過濾及分析，不能照單全收。而眼睇有時亦未必係事實之全部，放諸賽馬活動，亦覺得差唔多。不論你靠邊「科」度馬， 概括分三類，耳科（索料）、眼科（相馬）， 甚至乎數學科（Data）。像耳科，純粹靠聽，賽前冧巴有大堆，嗰日條線靈嘅，連扣中完又再連扣。眼科呢，沙圈睇馬，突然目光如炬，睇親件件都Ｗ。到數學科啊，隻隻Ｗ 都在計算之內。不過，索料也會索着火水，目光可能變死光，計數最終埋單係負數！

　　其實邊一科都有優越之處，但亦有不足地方，記得多年前有位前輩說：「如果剩係睇晨操就可以隻隻Ｗ都揀到，不如攞埋張床入馬場瞓吖！」另外，又有一位呢行巨人講過：「依家瓣瓣都要識，得一把刀冇用㗎！」所以，度馬之時，有主流睇法和思路係應該，之但係，多與少還要顧及周邊因素，縱使當中所佔思路運算的比重唔大，亦要存在，像開會之時「一言堂」點會好，「腦震盪」才能集思廣益嘛，對會議始有正面影響。

洪禮賢 馬會賽馬節目主持