借題發揮：世盃紅阿Paul 煞科戰捧蘇保羅

魑魅魍魉

　　世界盃打完嘞，紅咗嘅唔單止係西班牙、巴拉圭「教母」，又或者金球獎得主科蘭，仲有就係阿 Paul，嗰條世盃貼中8場勝方嘅八爪魚。正如日前本報頭版所載，傳有銀行出天價想羅致佢，當然，呢則可當趣聞咁睇，唔使咁認真。但今晚煞科戰，另一阿 Paul蘇保羅，佢嘅上陣馬千祈唔好唔認真咁對待噃！

　　今期煞科，阿Paul派出4駒，「無敵福星」一早分咗手，唔會再引到我注目，除非係唞埋唞埋嗰場則作別論。而其餘3駒分別係「智勝寶」、「皆大歡喜」及「納帕二號」，計能力唔係冇可能贏晒。

　　像頭場「智勝寶」，谷草往績唔叻，不過，前次話晒上到名，至於剛賽同程喼唔到成績，可能因為際遇問題，始終全程三叠真係蝕唔起，呢次排3檔則唔應該會冇形勢，弱馬唞番一輪，體力叉番足，對陣上演出亦會幫到手。

　　比較上，「皆大歡喜」及「納帕二號」，牌面好多啦，前駒雖則出名係二哥，之但係，有本事一再輸少少返嚟，分利係必然，加上，碰啱嗰場多馬擺前走，應該啱佢追，只要之前食慾不振唔係有咩後遺症，有望出頭。而「納帕二號」跨季12場入前四名，往績好硬淨，無疑近仗都係位置交代，分數好似有啲壓力，但啱啱嗰場初跑谷草都上到名，仲要只係輸條頸，難度唔係細。預計呢次用韋達，或在跑法上進取啲，效果隨時更好。一於整條3x4W捧阿Paul。

亨利