馮諾嘉手記：川河勁駒 十拿九穩

魑魅魍魉

　　唔經唔覺又嚟到沙田煞科日，個幾月後下個馬季至開鑼，馬迷今日一定要入場盡興一番，今日馬會唔單止邀請咗好多明星助興，仲會頒發各大冠軍人馬獎，韋達同柏寶則會為爭冠軍騎師而激鬥，估計賽事將會好精采，大家不妨入場湊吓熱鬧。

　　今季嘅冠軍騎師誰屬，相信今日賽後會有答案，韋達十匹坐騎中有七匹好有勝算，連場數胡唔奇，估計今日可以拋離柏寶。精選場次揀咗尾三場，第九場三班1200米，就用韋達坐騎「川河勁駒」做膽，呢匹馬出兩場贏兩場，睇走勢都係大把在手，蔡約翰畀韋達嘅馬之中，呢匹應該十拿九穩。配腳方面，「金堡龍華」上場跑同程改由普萊西策騎，結果爆半冷W，今次重遊勝途應會再接再厲，拖腳首選。「輕輕鬆鬆」在港四戰表現梅花間竹，前仗喺杜利萊胯下跑田草1200 獲亞軍，上仗落敗不過輸兩個馬位，今次回師田草兼用番杜利萊，當然要拖。拖多匹前次喺四班同程奪冠嘅「長勝」，喺三班負輕磅有權跑近。

一言為定配何澤堯實搏

　　第十場三班1600米，「一言為定」前次跑四班田草1400米，喺何澤堯胯下輕易贏兩個幾馬位返嚟，上場改配柏寶落敗，今場柏寶無坐騎，方嘉柏亦寧願配番何澤堯，可以睇到練者嘅贏馬決心，做膽。配腳先揀上場田草1400跑第三嘅「闊袍大袖」，今次增程跑1600求開齋。仲有「威騰駒」同「寶利多」，前駒季內同樣兩度獲亞軍，仲未開齋實好鬥志；後駒新勝同程，薛達志現時只得十一W，當然想多贏兩場畢業，呢匹馬實會再搏。

　　尾場二班1400米，馬膽「共創未來」，呢匹馬在港跑過四仗，場場入位，近三仗都跑第二，輸最遠亦唔超過一條頸位，未出頭只係欠運，上場排外檔走二叠蝕位，今次又排外檔，但A欄點都好過C欄，馬房當然想一雪前恥。配腳方面，季內喺田草1200米兩度奪冠嘅「虎虎生輝」，今次初跑1400米，相信會更啱腳法。「紅日」前仗同程跑第二，今場負輕磅仍有利。「愛跑得」前次就喺同程一放到底開齋，路程正宗要兼顧。