馮諾嘉手記：勁高手位靚贏得

魑魅魍魉

　　世界盃踢分組賽時，球迷已將注意力集中喺巴西、阿根廷及德國等三大球隊，個個都話佢哋最有冠軍相，結果淘汰賽三隊都已經出局，賽果令人覺得意外。入決賽隊伍已塵埃落定，將會由荷蘭同西班牙爭冠軍。
　　
　　世界波賽果出人意表，剛啱夜馬戰果同樣難估，喺韋達同柏寶鬥得如火如荼嘅關頭，馬迷都想睇吓兩大師傅點鬥法，結果又爆冷，由潘頓獨得4W，近期騎師鍾意連場數胡，潘頓亦唔執輸，當晚贏四場，締造佢個人喺香港一日內嘅贏馬紀錄，兼打破近期韋達同柏寶輪流發威嘅局面，八場賽事贏咗一半，其餘頭馬卻無韋達份，令冠軍騎師之爭形勢冇咁明朗，柏寶當晚就憑方嘉柏馬房嘅「開心動力」贏番場，將同韋達嘅頭馬差距拉近咗啲，兩大高手現時相差兩場頭馬，嚟緊兩個賽日，仲有得鬥﹗
　　
　　周日沙田十一賽事，心水馬膽係第二場四班1200米嘅「勁高手」，初出跑田草1000米已跑近，賠率只得7.8倍，已有唔少捧場客，熱身一場後再戰增程跑1200米，喺韋達胯下跑第三，當日跑黏地，呢匹馬喺外檔起步兼走外叠，形勢不利下只係輸四分三馬位，今場排內檔，形勢好過上次好多，開齋贏馬唔難。

喜聚寶捧盃交代
　　
　　當日仲有兩場盃賽，最矚目當然係第八場一班1600米沙田一哩錦標，呢場三個大倉都雙龍出海，當中以方嘉柏馬房兩駒評分最高，分別係上場同程入位嘅「競駿精英」同「喜聚寶」，兩駒近態都唔差，但小妹較為睇好「喜聚寶」，今季頻頻挑戰級際賽無功而回，季內未交代，上場回師一班賽兼縮程跑嘅1600米，隨即上名，排十檔起步，後上追勢勁，只係以頸位之差輸畀次熱門馬「醉味」，差啲爆出18倍冷W，乘勇再戰，配何澤堯減輕十磅，爭勝實力大增，當然想捧盃作交代，亦可以做膽。