馬主論戰

魑魅魍魉

任達華：歡騰繼續反彈　　

　　季尾時段，揀冷馬捧場應該唔會錯。最鍾意尾場「歡騰」，近兩仗跑泥地同谷草一哩非勝即位，五歲馬季初沉咗一輪之後，似乎已經重踏升軌，今次繼續跑谷草一哩，負輕磅兼排四檔起步，估計可以一早搶出領放，話唔定可以再贏。
　　
　　另外推介第七場「長有」，今季跑咗八場未贏過，但一月尾試過響田草1600米入Q，證明戰鬥力冇退化，雖然以往跑谷草未上過名，但只跑過兩次未能作準，用馬房近期愛將勞愛德操刀，絕對唔可以睇小。

張敬山：鍾意奄尖大少　　

　　今日係澳門電訊成立33周年嘅紀念日，呢間公司做到好成績，多得經理媚姐嘅領導，再加埋一班同事嘅努力。今晚我都會去澳門出席飯局，所以唔會入場睇馬，不過當然繼續有心水提供。先推介第四場「奄尖大少」，上場響韋達胯下贏得好出色，今次繼續跑四班賽，睇唔到有對手威脅到佢，可以再贏。
　　
　　另外鍾意第六場「清風送爽」，近兩仗響沙田對住一批惡馬都跑得好，今次轉嚟谷草跑三班賽，對手差一大截，排埋一檔坐位望贏。


梁廷鏘：吼實康樂名駒　　

　　告達理今晚手馬幾惡，我睇佢應該有馬贏。先推介頭場「康樂名駒」（圖），轉去告廐後三戰獲兩冠一季，四歲馬正值盛年，既然好開應該唔會突然走樣，再跑強項谷草1800米，三甲一席好穩陣。
　
　　　另一匹要留意嘅告廐馬係「雪山神駒」，上場跑谷草一哩，普萊西輕描淡寫之下都追入一席第四，狀態明顯已經返咗嚟。今次改由贏馬拍檔韋達操刀，威力肯定大增，A欄排外檔影響唔算太大，只要交出水準，贏番一場唔難。