借題發揮：大告撚轉倉馬手法嘭嘭聲 雪山神駒筍盤

魑魅魍魉

　　對待轉倉馬，各廐主心態都唔同，尤其是兩練者關係友好的話，隻馬東家過檔西家，通常都唔使旨意轉馬房第一回合就郁手，好些接手後，只係承接着操練，唔多肉緊，唔知係手法如是，定係咩原因，普遍冇得三幾場都唔會轉勢。但又唔係冇練者專門「省招牌」，今季大告已經係表表者，之前嘅「康樂名駒」，轉倉頭兩回合「嘭嘭」，先打兩鎚，加完分跟住再整多個P，完完全全變了另一駒！而「常山鳳寶」在大摩手上搏極未贏，去咗告達理一排又順利開齋。仲有「靚到爆」，贏過嘅，喺佢手上都贏得。此外，唔係好想提，但其實再之前「好爸爸」衛冕香港一哩成三連霸，唔通大告功勞唔大咩？！

　　講番大告今次上陣馬，質與量都夠晒，當然，要期望佢好似上游嗰堆馬房咁，1日贏4、5場，相信機會較渺茫（因今季此廐只曾1次起孖），但要爭取成績就唔係好難，6大件出賽，正常估計，好大機會有一半或以上入到圍。

　　亨利又唔係對此廐盲目追捧，譬如「常山鎮寶」和「搏得威」，基本上我已經舉手投降（嚴格嚟講，前駒都未完全死心！），目標馬先自不然放在「康樂名駒」、「常山鳳寶」及「雪山神駒」身上。前兩駒好緊嘅，唔使點擔心，而後駒則係歸隊性質，有「康樂名駒」兩W在前，唔慌呢匹馬唔恨贏。而佢轉馬房後跑了兩場，的確係愈來愈近，其實上場如果拉士肉緊多少，經已有P，姑勿論如何，既然一場比一場接近，韋達忽然攞番帥權，呢匹減分過籠嘅馬，係時候要交代嘞。 　

亨利