借題發揮：胡森200W在望 太平洋換人仲好

魑魅魍魉

　　胡森馬房單單在5 至7 月，已經累積13W，比起9至4月的頭馬量，數目居然係一樣，就知到嚟到尾聲，呢個馬房嘅攻勢真係唔講得笑，冷到30倍以上「驍將王」照爆，熱至4、5倍 W嘅「龍得風雲」、「好快活」亦告得手，而5月中到依家，仲曾經試過3期起孖。所以，就算表面上呢期佢啲馬唔係咁吸引，都唔好當佢absent，尤其佢目前在港已累積199W，再添1場便到另一里程，點會唔趁目前有勢搏得就搏。

　　望落佢手馬，有實力而又有賠率嘅「太平洋」，值得試吓水，雖然上場落番五班唔算好有走勢，一來，當日賽事模式對後上馬極不利，二來，佢嘅跑法已經夠被動，直路彎仲要再蝕啲，飛到出十叠過外，咁蝕法返嚟輸四個身位，其實已及格有餘。預計今場有三兩駒會擺前走，對後上型嘅佢啱晒，韋達唔騎仲好分頭，點會係壞事。

　　至於「風陵渡」就唔使講咁多，四班長期有利，尤其跑田泥1200米，呢次一落班即轉場地，用埋夾過又跑得好嘅蘇狄雄，仲有埋2 檔配合，唔慌冇胃口。另外，「至勇飛龍」無啦啦轉泥地，未跑過唔知性能，但賽前試過兩個泥地大閘，乜都仄準啩？！雖則過往在二班長期捱打，話晒開了竅，加上本身夠噸位、檔好及跑法主動，統統都係利好因素，唔排除再捷。

亨利