馮諾嘉手記：暖在心頭繼續反彈

魑魅魍魉

　　今屆世界盃好有戲劇性，先係上屆冠亞軍意大利同法國晨早喺32強出局，最多粉絲嘅英格蘭16強都出唔到線，就連巴西亦無緣晉級四強。近期香港馬圈嘅話題則相信離唔開韋達同柏寶，後者近期試過一日六W拋離對手，話口未完韋達已喺一次賽事之內追番五場，上周四再中三元，今日戲劇性一刻隨時誕生，柏寶近兩賽手風唔多順，韋達騎足十一場，睇佢手馬，追平甚至反先對手都唔奇，一定要密切留意。

　　精選場次第六場四班1800米草地，先講講柏寶其中一匹餐士馬「暖在心頭」，今季落到五班四戰，前仗終於有突破性演出，喺卓利胯下跑田草 1600米爆40倍冷Q腳，柏寶即刻攞嚟騎，上場大熱開齋姿態輕鬆，今場雖然上番四班但負磅減輕，當起有權繼續反彈，做膽。配腳先揀上場以短頭屈居第二嘅「健康藍莓」，其次係連番跑近嘅「長春樹」，強配韋達更有信心，冷腳吼「天子駕六」，由二班落到嚟四班，評分新低有冷機。

科研精英夠準

　　第九場三班1200米泥地，呢場支持吓韋達，馬膽揀佢匹「科研精英」，至今六戰獲一贏五位，演出好準，上場初跑谷草抽排外檔，改用中置跑法仲要走三叠，轉直路彎蝕位甚多致敗，今場跑番贏馬路程，排二檔不俗，交出應有水準夠贏。配腳方面，「聖迪達」同「時時攞彩」近績都好，拼後狀態亦可以保持。拖多匹「勁飛馳」，喺三班兩勝同程姿態都幾輕鬆，證明喺呢班分量十足。

　　第十場一班1000米草地，用「明燈」做膽。呢場好多人睇好「萬事佳」，五戰同程獲四冠一亞，場場喺度，但上場勝後加成十一分咁多，兼由三班跳級挑戰一班賽，對手強咗好多，加上今場多快馬，十檔嘅「永寶駒」隨時拍住鬥放，預期步速會好快，鬥燒之下一定影響表現，所以只係配腳首選。講番「明燈」，近兩場田草1200米都跑第二，狀態當弗，呢程亦贏過，排十二檔，貼欄跟喺二、三位相當好跑。其餘兩席配腳，「福勝滿載」新勝猶勇，「開心歡笑」跑番一班賽級數較高，都有權爭入三甲。