洪禮賢 講馬：天之驕子 搏主項

魑魅魍魉

　　近期唔係韋達就係柏寶狂數胡，再唔係就一人一半，頓時令到成個馬場好似得佢兩個人跑緊馬，但物極必反，會唔會呢次賽果冇咁悶，如果睇佢哋坐騎實力，同埋，隔夜騎師王賠率走勢，成數都幾大。

重心場次

第5場  第四班（60-40分）1600米

　　天之驕子此程可緊隨「旺舖福星」及「豪情拍檔」過終點，四班唔會冇得贏，尤其睇埋上場轉到1800米，在劣勢下仍有Ｐ（直路彎及末段被撞），更覺佢有本事﹔今次隔番一輪儲夠體力，又肯回到主項，唔會冇鬥志。

　　「歡樂寶寶」上場入Ｐ水準其實有限，之但係，本身平衡唔好又唔易控制，仍可爆上嚟，如以此角度則具憧憬價值。「喜勝威」念念不忘兩仗前在三班閃閃身輸近的賽績，既然上賽或因準備有瑕疵跑輸（隔了太耐才復課），而今場工序冇唔妥兼用到阿勞，再畀機會。

    「開心贏」季內只跑了３場，體力在季尾贏晒，上場短途當開氣，輸成點唔使理，熱身後即加程，隨時現形。「幸運相架」連續兩場出閘「甩咳」，係習慣了，還是偶發性，唔知﹖如3檔又可慢放則有變數。

第1場  第四班（60-40分）1000米

　　好快活長期在同程跑二至六名，只要發揮上無誤，在此班唔會係二線馬。「皇仁勁駒」計死數，剛仗可黐住過百分「美猴王」過終點，返番呢班惡到出汁。

    「飛魚駿王」出腳有點亂和促，目前跑直路賽好過，希望加頭罩可安撫其臨場情緒。「威馬加鞭」速度唔係一般四班馬可比，今次落班即用愛將及加罩，有變身可能。

第2場  第五班（40-0分）1400米

　　喜鵲及「愛拼者贏」在班次上佔上風，不過又唔係有什麼穩健性，前駒唞番一段日子，希望減低走樣可能性﹔後駒剛仗「外遊」，發揮上睇到眼冤，估到今場2檔唔會再遊啩﹖﹗

    「誠信心」冇內檔或交唔出應有水準。「百威紀錄」很難界定上場係水準唔高而鬥爬輸近，還是轉倉後重生，個人則傾向後者居多。「幸運來」內閃毛病已除，落班會有So。

第3場  第三班（80-60分）1200米

　　開心自在上場為要避泥頭，幾乎全程在啜腳的內欄跑，入到直路又要花時間擺咗一輪軚，最終尚可衝入第四名，難度相當高﹔跑番正常場地，配合埋好位，至少有三甲。

    「金堡龍華」馬重再跌或是負面因素，但縮程加罩則會好。「大旋風」此程性能唔會差過谷草。「友利多」1檔啱放，好快地縱打折扣，亦唔排除放入Ｐ。「來福」係擔心曾經發燒。「海王子」上場同一騎師而演繹冇點犯錯也冇獎金，難再有寄望。「御將軍」10檔兼冇地利，未必夠爭。

第4場  第四班（60-40分）1400米

　　吉利多和「又贏晒」置身一場未必有步速的賽事，在跑法上可能受惠，當然，排了中外檔唔係冇風險，表現好壞要視乎早段際遇。

    「聚豪精英」唔係幾夠班，好在檔靚及磅輕，有權偷襲。「紅冠子」堅持前仗露了光，獨贏幾十倍，建議拖多一次。「旅遊大亨」連續兩場有痰而敗，難計。「哈哈大少」落班係好，但C欄1400米未嘗上名，拖腳尚可。「雄心馬主」出得太密，體力未必及時回籠，不過，今場形勢啱佢發揮。

第6場  第四班（60-40分）1600米

　　睡得好穩陣到跑兩場才加程，目標好清晰，放在今場1600米，唔會冇企圖，計分亦減過籠了。「名人」未斷纜仍要重視，始終跑法進取，經常有着數，尤其今場又可能前中段唔快。

    「萬子千紅」隔夜無故有飛，奇怪﹖﹗「新領袖」上場取位差勁，塞死咎由自取，換人再跑，小心即刻返嚟。「魅力心」和「寶利多」有班卻重磅，限爭Ｐ。「連利威勁」上賽臨場有揀，好開、換阿寶及增程，俱為利好因素。


第7場  第三班（85-60分）1000米

　　旅英駿駒準一班馬仍可跑三班賽，卡士贏晒，除非搏到攰或陣上有大錯，否則穩勝。「喜萬家」速度可靠，不論田、谷1000米亦如是。

    「尚駿心」似廐侶「好快活」，有能力卻要形勢夾。「牛精巨星」上場沿途攞位睇到Ｏ晒咀，換人、轉程及降班，有晒藉口開脫。「勝利旋峰」及「聖河」稍有冷敲價值。

第8場  第三班（85-60分）1800米

　　危險英駿能在變化地追得好已有驚喜，另外，臨近季尾時分，一再於賽前仍肯撻閘，似乎未有草草收場心態。「印度光輝」此程有晒根據，而撇開上場谷草敗績，其實一直喼得到。

    「太平星」上賽前已指出做到夠才動身，出得唔會冇野睇，但今次加程則要博。「曬冷王」究竟剛仗係因失蹄、緊迫等因素而跑得唔好，還是其他原因，真係唔知，但仍認為前仗入Ｐ一役，跑姿及衝勁方面明顯強化了，所以可再畀機會。

    「赤胆雄威」如臨場情緒冇問題，又出到閘，實力夠爭。「大家開心」冇欄冇命咁滯。

第9場  第三班（80-60分）1400米

　　有莊有閑休出縱存在風險，但賽前已試足3個大閘，冇理由仄唔真，超級馬不宜挑剔太多。「濃情」初出拉士爆得勁，看來好多虛分。

    「羅馬奔騰」轉馬房即有截然不同演出，或是爆升的前奏。「千江映月」長期追得吓，唔可以睇小。「玩具神話」睇落上場係賺晒至贏得到，不過，呢次又可能繼續賺。「真奇寶」冇淋地唔易發圍﹔「八逢九紫」除非遇到大家發緊夢，畀佢慢慢放，若不，幾難爭上名。

第10場  第一班（105-80分）1400米

　　安御又係休出，又係有大閘仄真進度，此類馬儲儲埋埋，有強大體力撐腰，季尾最有甜頭。「天久」只要今次出閘唔好再失靈，必屬今場要角。

　　「按得快」1檔預咗賺形勢。「金獅威將」剛仗似乎係因場地拖垮，勿介意大敗。「光輝出擊」隔夜Ｐ飛嚇親。「魄力寶」C欄1400米向來唔錯。「風雲勇子」明明臨場已見好，或是場地未配合，有賠率可諗諗。「清風送爽」再上多班，要面臨好大考驗。