馬主論戰

魑魅魍魉

喜萬家咪睇小

　　季尾揀馬，幾時都係冷好過熱，今次繼續向冷門馬埋手。第七場嘅焦點一定落響「旅英駿駒」身上，三歲馬雖然有實力，但賠率欠奉，博分頭反而可諗吓同場隻「喜萬家」，上場同前駒鬥到頸位分勝負，今次跑番最耍家嘅直路賽，話唔定可以反先。

　　另外推介第九場「真奇寶」，前仗先響田草1400米贏馬，上場再跑同程亦唔係輸得遠，證明近況唔曳。今次再跑1400米，同場唔係太多放頭馬，若然畀佢擺響前面順走，有權偷雞。

任達華

皇仁勁駒夠惡

　　剛啱「盈彩繽紛」完成一季七捷，可以話創造歷史，不過同場跑第三嘅「皇仁勁駒」，走勢就更加吸引我。當日呢隻馬蝕晒分上陣，終點前居然可以拍住評分過百嘅「美猴王」一齊返嚟，今日落番四班上陣，試問邊度搵馬同佢跑﹖一於捧場。
　　另外推介尾場「按得快」，季內贏過「金獅威將」、「雅雪」等對手，計卡士響度唔會輸蝕，而且跑法主動嘅馬，今次抽到一檔起步真係好着數，同場名氣馬多，佢會有賠率，值得一博。

張敬山

鍾意清風送爽

　　去到季尾，唔少馬已經搏到攰，揀啲後生馬嚟捧場應該冇錯，起碼體力都回復得快啲。先推介尾場三歲馬「清風送爽」（圖），季內只係跑過六場，體力方面應該唔使擔心，上場響1400米已經上名，今次負輕磅再跑同程，隨時贏得。
　　另外鍾意第三場「開心自在」，同樣都係三歲分子，話晒前仗可以擊敗「旅英駿駒」贏馬，實力一定唔簡單。上仗響軟地上作賽，輸咗唔可以作準，今次跑番正常場地，隨時有權現真身，值得捧場。

梁廷鏘