馮諾嘉手記：柏寶最想開心自在

魑魅魍魉

　　噚日講過韋達兩匹機會坐騎「安御」同「有莊有閑」，今日當然要講吓柏寶嘅馬。第三場三班1200 米，柏寶騎李廐「開心自在」上陣，呢隻馬至今跑過五仗，全部都跑入前五名，前仗更擊敗「旅英駿駒」贏馬，盡顯驚人潛力。上場遇上軟地大敗，賽績唔能夠作準，呢兩日天氣開始好番，只要屆時場地狀況正常，柏寶好有機會憑呢隻馬贏番場。

　　配腳先揀「友利多」，近五仗跑獲兩亞一季，六歲馬近期狀態明顯回勇，上場跑谷草1200米排外檔起步，輸咗唔使太介懷，今場回師田草1200 米，有望跑近。「金堡龍華」上場轉方嘉柏馬房初出，跟入一席第八返嚟，試馬味道好濃，小心今場變身。「大旋風」唔一定谷草先啱，轉嚟沙田都有威脅，四連環拖埋會有分頭嘅「海王子」。

　　至於第六場四班1600米，小妹就鍾意另一匹李廐馬「名人」，近四仗響同程取得兩勝兩位，三歲馬已正式步入穩定期，今次改由楊明綸減磅上陣，估計又可以一早搶前操控步速，能唔能夠再贏要睇吓今場形勢，但三甲一席應該好穩陣，可以放心做膽。

　　配腳先揀新勝猶勇嘅「魅力心」，近兩仗響陣上都交出凌厲後勁，唔能夠睇小。「犀利仔」上場響1400米突然跑近，似乎已經開始上力，跑法主動嘅馬今場或者可以賺形勢，要拖。「寶利多」上場跑三班賽亦後上接近，今次落班兼強配韋達，就算負重磅都要吼。「連利威勁」上場跑泥地1200米都上名，今次增程更啱跑，要繼續跟進。