世界盃勁吸馬場8億

魑魅魍魉

香港人出名鍾意睇波，尤其世界盃四年一度更加令人瘋狂，適逢今季賽馬加咗五日賽期，跑到7月中至煞科，撞正世界盃喺呢段時間舉行，賽馬投注額即刻受挫，今個月16日沙田跑11場日馬連10億彩池都唔夠，反觀由6月11日開波的世界盃投注額就直線上升，世界盃威力有幾強，淨係睇呢個數據都知。
       
應家柏 設計圖片及對白

本地日馬一向以10場賽事做主流，跑11場嘅次數唔多，但喺今個月6日之前，季內編11場從未試過投注額收少過10億，最差一次喺5月1日都有10億零796萬。今年世界盃喺6月11日開鑼，五日後跑端午節日馬，結果11場賽事只得9億9千8百幾萬彩池，仲差110萬先到10億，場均投注額九千萬鬆啲，比起以往平均一億彩池一場少咗成千萬。假設世界盃平均喺每場賽馬吸走 1000萬投注額，一日10場就冇咗一億，世界盃踢足一個月，以一個月跑八次馬計，賽馬咁就唔見咗八億投注額。
       
荷蘭前鋒 尹佩斯 設計圖片及對白

當然你會話賽馬同足智彩都係由馬會營辦，投注額左手交右手，但係馬會喺兩個範疇角色大有分別，賽馬佢係抽佣嘅中間人，全冇風險；佢喺足智彩就做莊，自負盈虧冇佣抽，呢門生意有風險。如果賽馬投注額流咗去足智彩，其實對馬會唔多着數，望都望賽馬投注額升，而呢種情況對社會公益慈善服務亦都有利冇弊。
       
馬迷資金轉移捧愛隊

世界盃好似吸金咁，將群眾注碼吸走，正如資深馬迷陳先生所講，錢就賭咗幾十年，世界盃四年一次點都要買啲捧愛隊巴西場，喺本金都係咁多嘅情況下，馬自然賭少咗。呢種心態正好反映出世界盃對賽馬嘅影響，既然資金轉移咗，賽馬投注額喺世界盃期間下跌，絕對可以理解。