馮諾嘉手記：輕輕鬆鬆開勝門

魑魅魍魉

　　聽日跑馬地編排十場賽事，今晚亦有五場海外賽事舉行，由夜晚九點半開始越洋轉播五場英國賽事，當中重頭戲金禧錦標，就有「鳥語花香」同「時尚風采」兩匹香港代表參戰。

　　今季香港馬遠征海外表現唔錯，當中「時尚風采」早前先至揚威杜拜，勝出三級賽阿喬斯短途錦標，而「綠色駿威」亦贏咗新加坡KrisFlyer國際短途錦標。早前小妹已經講過，依家香港一眾短途馬級數好高，即管睇吓今次「鳥語花香」及「時尚風采」遠征金禧錦標，可否為港爭光喇！

　　第八場三班1200米，小妹揀咗「輕輕鬆鬆」做膽，呢隻馬初出已經有飛，證明幕後對其質素有一定信心，結果僅輸短頭位跑獲亞軍，但已反映實力唔簡單。上場轉跑田草1200米，對住實力好強嘅「戰河」，能夠入Q其實都有晒交代，今次返回谷草上陣，預計會有更好發揮，排三檔起步有利，開齋在望。配腳先揀前仗響同程輕勝嘅「大進」，肯定仲有分在手。「活力至寶」近兩仗響同程獲一冠一亞，必定要拖。「心中有勁」季內一戰此程即入Q，唔可以睇小，四連環可拖埋熱夠身嘅「大衛精神」。

　　尾場二班1650米，小妹鍾意「愛跑得」，上場響田草1400米一放到尾贏馬，轉爭谷草一哩有權添食。配腳先揀「雄風」，跑番谷草隨時由蟲變龍。「好兄弟」近仗演出準，要拖。「夢幻組合」上場響沙田對住「點心」、「金德寶」等強敵都跑近，轉嚟谷草要吼，四連環揀埋柏寶坐騎「永勝多」。