洪禮賢講馬：愛拚者勝賽績養眼

魑魅魍魉

　　韋達復出係咁贏，柏寶則好似食咗豬油糕，寧買當頭起，加上韋達嘅拍檔蔡約翰今次成批兵力「曬冷」，點會冇帶挈，睇嚟又係三兩Ｗ濕濕碎嘅格局，相信韋達今戰又可再迫近柏寶了。

重心場次：第6場  第四班（60-40分）1600米

　　名人以為兩W之後會「失蹤」，點知上場幾乎再贏，似乎踏上升軌後，打算用盡第一浪，而賽後工序冇停，意味着仍有意思再搏﹔同場唔係冇快馬，預期主動型嘅佢或食到形勢（除非鬥燒就例外﹗），膽材。

   「中華寶寶」之前曾在谷草入Ｐ，當時仍覺得符符碌碌，但見上場初跑此程兼直路唔多規矩也輸近，演出比預期叻得多，希望今場執正埋配搭，有更佳發揮。「越跑越有」近仗在路程、跑法及配件上試嚟試去，卒之到上賽入Ｐ，證明已找到竅門，呢次肯再揀此程，應會繼續好。「靚好聲」目前仍未成熟，上賽直路仍見「片」，但出閘反應已略進，始終是有點前景之馬，就算唔穩健，都要拖一注。

    「幸運相架」連續兩場跑得唔好，其實唔係冇借口開脫，但呢次轉到此程又排10檔，除非畀佢攞到主動權慢放，若不，唔係咁易應付。「好旺財」冇乜料，係跑形勢而已。「標青」冇內檔幫手不易攞着數。「軍士」如地淋，戰鬥力差好多。

第1場  新馬 1200米

　　如願以償初出彈甩對手贏馬，進度唔同班，只加4磅再跑，如果唔係唔識轉彎，篤定再Ｗ。「軒轅勇將」段段有跑法，經常會攞到着數，尤其係地慢，更具優勢。

    「獵豹小子」唔係短途馬，加上曾傷腳，機會點都睇淡多少，只係尊重往績才拖腳。「甜將」試800米閘有走勢，但證明唔多。「帶旺來」連串試閘皆予人不錯印象，或可在首戰即有表現。

第2場  第五班（40-0分）1800米

　　兄弟班連續兩場都貼，而上場用啱跑法即入Ｑ，可見轉倉後亦已夠進度，只係陣上演繹問題左右了成績。今次轉大場唔怕，長直路或更啱追。「暖在心頭」既露了光，又肯加強配搭，唔會縮槓。

    「心喜悅」8檔有點尷尬，如際遇配合到則會有威脅（上場沿途外叠蝕位亦得第五名）。「森林活泉」落到五班超晒，雖則上賽冇走勢，可能係楔內欄關係，呢次排大外檔，未必幫唔到手。「勁霸龍」此程要留放一絕才扳到。

第3場  第四班（60-40分）2000米

　　長春樹個個等佢跑長途，呢次終於如願，估計佢嘅戰鬥力，比起上賽更惡。「瀟洒大少」上賽前已指出，前仗輸到唔似真，實績好唔真實，所以上賽跟多次，跑獲殿軍恰如其分，而本身以此程最擅長，轉程應會好。

    「電訊高星」向長途發展令能力升值，轉到田草一樣啱。「勁擊」和「勁好友」近績穩定但難贏，作配無不可。「火耀雷霆」陣上不易跑得啱，形勢好難配合，若計分數則大利。

第4場  第四班（60-40分）1200米

　　威德妙上場贏唔到係略失望，只怪頭馬變化地太厲害，但第三名「精靈勇駿」再出補中，前駒也應有同樣能力。

    「太極至尊」回到田草，總好過在細場，如出閘唔再慢，發揮到該有的能力，重磅也甚有殺傷力。「駟馬難追」剛仗入Ｑ水準不錯（只係走規仍未完善），值跟進。「塑料旺」初出閘前反應唔好，直路又近乎失去控制，一樣可追入殿軍，明顯手上虛分多的是。「中國好」落班第二回合才跑番此程，目標可能在今場。

第5場  第四班（60-40分）1400米

　　愛拚者勝前仗贏來大超班，而上場唔喺主項都輸近（仲要係出閘慢有影響），賽績好養眼，呢次重返勝途，睇高一線。

    「旅遊大亨」上場因有痰及陣上意外影響，計馬在此班略超。「確威星」剛賽全程「外遊」，名次及所負距離全無參考性，今次換人及加配件，可再畀機會。「雄心馬主」可取在近期有狀態。「陸豐福星」心律不正復出，之前曾停過１個月唔操，但隔夜捧到大熱ＷＰ，好奇怪﹖﹗

第7場  第三班（80-60分）1600米

　　威騰駒排內檔跑高好多，只要跑得出之前入Ｑ的水準，唔係冇機會出頭。「天瞳」休出在路短情況下也湧得吓，一經開氣即返回中程，能力可三級跳。

   「迎利多」嚴格來說上場的殿軍唔係證明好多。「飛快勇」連仗有番走勢，分利馬不妨再畀機會。「豪情拍檔」初升班一樣克服到，加磅後亦只負121磅，冇壓力可言。「蓋世子牙」上賽贏得太遠，反而驚喼唔到水準。

第8場  第三班（80-60分）1200米

　　川河勁駒首次登場以比晨操更輕鬆的姿態贏馬，加15分唔係苛刻，大超級馬唔見得會因升班而有阻力。「蜚聲」一向早段太落後，加罩如幫到手，唔難入Ｐ。

    「人人興旺」外地賽績準，在港試閘亦佳，唔排除首場便有嘢睇。「霹靂槍」冇馬夠佢快，７檔亦可搶欄放得出，唔難有Ｐ。

    「高一線」再跑落去如果唔加程，隨時又出現追唔切鏡頭。「海王子」及「新蝦王」邊線馬

第9場  本地三級賽 1400米

　　醉味賽績太準，恃輕磅在此卡士唔係蝕好多，場地快慢又對佢影響唔大，應有三甲。「自由好」級數最高，跑新鮮亦好，卻選擇1400米，只怕直路撻唔起。「步步穩」連贏兩場，不過今次排外檔略有擔心。

    「新力勁」上場直路塞幾次，敗績不要介意，突然用到柏寶，值博。「火箭動力」磅輕路程啱，更重要係對手唔多，近仗之中以今場條件最理想。「好日子」此程太短了。「安畋」耐冇出，一時未必復現能力，反而「陽明好好」落番1400米仲有得博。

第10場  第三班（80-60分）1400米

　　闊袍大袖等到肯加程，能力或可翻一番，不過必先要改善頭段太慢的問題，得唔得就要睇首次加頭罩的功能了。「歡歡樂樂」在谷草「外遊」也拒絕輸遠，近況差極有限，忽然加程而用到柏寶，有企圖。

   「傑出君子」準字行頭、「國寶」亦然，拖腳唔反對。「進取」此程曾上名，今場有內檔好好跑，大冷腳。「好妙星」要大爛地才考慮。「好有勝」久唔久追得吓，視乎今日賽事模式利唔利。

第11場  第二班（100-80分）1200米

　　明燈和「戰河」一對蔡廐馬，前駒有級數，後駒前景秀麗，頭馬應非此即彼。

    「三和之星」 由田草1400米縮至此程，應有好冇壞。「虎虎生輝」進度比預期細，在二班唔多超班。「步步快」視乎如何處理跑法，如像上場「無啦啦」放頭，腳都唔使拖。「福勝滿載」及「綠續有贏」，買Ｔ或Ｆ可拖。「快樂小子」總覺要加程才啱。