馬主論戰

魑魅魍魉

東廐綠續有贏

　　蔡明紹停賽，唔少東廐馬都用陌生配搭，但話唔埋會有驚喜。先推介尾場「綠續有贏」，季內試過響田草1200米彈甩「歡樂繽紛」贏馬，實力一啲都唔曳，之後不斷轉路程，冇表現唔能夠作準，今次回師強項兼改配卓利，話唔定可以一網打盡。

　　另外鍾意第五場「旅遊大亨」，季內贏馬一役後勁驚人，三歲馬絕對唔會就此行人止步。上仗輸在氣管有痰，敗績唔可以作準，今次初配湯智傑上陣，隨時會擦出火花，有賠率更加唔可以錯過。

任達華

電訊高星必拼

　　今日有9位嚟自國內南山嘅同事來港，我當然要盡地主之誼招呼一下，佢哋今日先會去海洋公園玩，到咗夜晚我就會約埋佢哋一齊去蘭桂坊飲嘢，希望到時可以順道慶功喇﹗事關「電訊高星」今日又跑，上次呢隻馬已經證明過有氣量，今次跑2000米絕冇問題，希望一班同事能帶畀我好運，順利贏番場頭馬。

　　另一匹心水係「豪情拍檔」，上場響田草1600米贏得好輕鬆，擺明有分在手，一於同「電訊高星」買番條W二串一，贏夠今晚使費﹗

張敬山

霹靂槍開火

　　我哋隻「霹靂槍」（圖）今日又上陣，呢隻馬近期對住「飛闖」、「天久」等強敵都可以上名，證明狀態確實幾弗。今次再跑1200米，雖然面對「川河飛駒」同「蜚聲」兩匹惡馬，但計落未必冇得跑，希望可以贏番一場喇﹗

　　至於重頭戲精英盃，大摩派出「步步穩」、「新力勁」同「醉味」上陣，睇嚟志在必得。三駒之中，計級數梗係「步步穩」最高，不過「醉味」季內六戰獲兩冠三亞，演出準之餘仲不斷進步，我睇未必係副車。

梁廷鏘