馬主論戰

魑魅魍魉

天寶之威夠準

　　今日有三場泥地賽，揀番啲有根據嘅馬捧場，應該冇錯。先推介第六場「天寶之威」，以往跑過四次泥地賽，獲得兩冠兩亞佳績，輸嗰兩場全部響半個馬位之內返嚟，演出夠晒準，今次換楊明綸減磅跑泥地1800米，我睇好佢贏得。

　　另外要吼實第八場「天久」，上場初跑泥地1200米即一放到底贏馬，仲彈甩亞軍「聖迪達」三個馬位，泥地性能肯定出色。今次再跑贏馬路程，雖然對住明星馬「盈彩繽紛」，但計落未必冇得鬥，不妨捧場。

任達華

高駿施冷箭

　　最近兩位朋友郭飛同李軍由北京嚟咗香港，今日我將會同佢哋入場睇跑馬，之後仲會一齊過澳門吃喝玩樂吓，希望佢哋會帶嚟好運喇﹗我哋今日有隻「電訊超星」上陣，不過進度仲未夠，估計機會只係一般﹔反而我較為睇好頭場隻團體馬「高駿」，近兩場都跑得唔錯，有望響季尾階段拉番場頭馬，冷冷哋諗得過。

　　另外仲鍾意「馬皇帝」同「精英財星」，前駒用到韋達應該係時候開齋﹔後駒轉苗廐後兩場都跑得好，未交代前唔會手軟。

張敬山

駿馬精英再贏

　　大摩今日出馬唔多，但全部都有一定實力，我睇好佢有馬贏，其中尾場派出「火龍駒」同「駿馬精英」（圖）雙龍出海，計值博率可能後駒仲高啲。呢隻馬近兩場先後響田草1600同1800米贏馬，擺明大熟大勇，改配馬房近期愛將賴維銘上陣，未必係副車，要吼實。

　　另外要留意第九場「飛闖」，上場同「旅英駿駒」鬥到頸位分勝負，後駒剛啱已經響谷草1000米再報捷，證明賽事水準好高，今次增程跑1400米更加啱發揮，坐位望贏。

梁廷鏘