馮諾嘉手記：龍的傳說淋地仲正

魑魅魍魉

　　今晚谷草八場賽事，天文台預測有狂風雷暴，希望屆時真係有雨嘅話，都唔好集中落喺跑馬地，以免場地大受影響，搞到連場爆冷。

　　精選場次第五場三班1800米，用「龍的傳說」做膽，喺香港跑咗十幾場仲未打開勝利之門，最近三場谷戰都跑梗頸四，今次改配潘頓希望轉手風，抽一檔有利貼欄競跑，來港前贏過爛地，如跑變化地，可望開齋。配腳先揀「勝利福星」，前兩場喺柏寶胯下奪冠，上場因柏寶停賽改由都爾策騎，末段發揮得未如理想，今次回配柏寶，隨時可收復前失。第二匹要拖嘅係「星際雄師」，近三戰獲冠季各一，呢程有根據兼狀態當弗。最後係「旅遊小子」，上場谷草一哩只係以短馬頭位之差跑第二，谷草1800亦跑過位置，有權再次跑入前列。

好兄弟落班惡

　　第六場三班一哩，「好兄弟」季內不斷減分之下，今場落番三班有惡氣，隨即強配柏賽，兼跑番首本路程，絕對係有晒部署，今場又有二檔之利，做膽。配腳可拖上場同程贏馬嘅「靚到爆」，同埋近兩場喺同程跑近嘅「帝豪龍駒」，仲有新勝猶勇嘅「聚好盈」。

　　如果今晚真係落大雨，相信上半場內檔放頭馬最好跑，但去到下半場內欄場地分分鐘已經畀馬匹踩到好爛兼有唔少水氹，到時外欄場地反而仲好，但實際情況要等臨場觀察。第八場三班1200米，「活力至寶」至今跑過四場，喺沙田獲冠亞各一後，上場初跑谷草即一放到底贏馬，三歲馬評分仲有大把上升空間，上場亦係跑淋地，場地變化亦冇有怕，最佳馬膽。

　　配腳方面，「大旋風」近三仗不勝有位，末段走勢都好凌厲，性格忠心演出準繩，亦曾喺淋地跑第二，拖腳首選。「大進」上場小休復出跑同程，走勢相當強勁，以個幾馬位輕取亞軍「海王子」，相信今場都係前列分子。「祥勝愛駒」上次同「大旋風」同場，差不多同頭馬「卡加大師」一齊衝過終點，頭三名以極短距離分勝負，既然「大旋風」有機，排二檔嘅「祥勝愛駒」當然亦要兼顧。