借題發揮：連跑5屆遮打盃 爆冷具歷史意義

魑魅魍魉

　　今日唯一一項盃賽係第八場遮打盃，此乃季內最後一項一級賽，當然，今季唔會有三冠王產生，因頭兩關盟主「友誼至上」及「閒話一句」都冇份跑，所以，連兩冠王都唔會有。事實上，自從多年前設立三冠系列賽以來，都係得一匹「翠河」有本事做過三冠王，仲要當年尾關唔係2400米，而係2200米，故此，現今要贏晒三關真係唔易。

　　來到今屆遮打盃，出馬唔多見怪不怪，得7隻而已，焦點其實落喺兩駒身上，「爆冷」和「極品絲綢」，後駒貴為打吡盟主，冇耐之前嘅女皇盃又跑得好，以四歲之齡有能力突破，點會唔受注目。至於前駒受注目程度當然更犀利，第一個賣點已經係歷史意義啦！佢唔覺唔覺跑咗4屆遮打盃，贏過3屆嘞，跑第二嗰年，多少係因為遠征完，狀態未及時pick up番，至會畀「包裝大師」走得甩，如果今屆都畀佢贏埋，成就真係唔講得笑，往後有冇馬可以破到呢項紀錄，成數微乎其微（連跑5屆都難！）。

　　此外，又到季尾時分，冠軍人馬獎就到嘞，「爆冷」以前原本係無冕馬王，上季終於一嘗真正當選馬王的滋味，按理上季贏了4項本地級際賽都獲加冕，咦！今季雖然贏得1W而已，但至少係國際一級賽，假如佢又蟬聯到遮打盃，締造歷史的話，在選舉時的拉票能力一定加大。

　　當然，亨利主觀意願還意願，得唔得都真係要問過「極品絲綢」，甚至乎「至勇威龍」啦。　

亨利