借題發揮：C欄內檔好冇得拗頸 信緣是燦爛風之子

魑魅魍魉

　　今晚跑谷草C欄，正常場地已經有一定程度偏差，如果落多兩滴雨（天文台話大致多雲，有一兩陣驟雨），都唔使旨意偏差唔會進一步嚴重。事實上，睇番對上3期谷草C欄賽事，嘩，唔CHECK猶自可，一CHECK真係冇得拗，24場頭馬當中，居然有 17W係由一至五檔馬勝出，比率超過7成，無論短途，中距離，甚至乎長途一樣係咁模式，甚麼「包裝好友」、「七星仔」、「引伸波幅」等等，例子多到數唔晒！

　　而睇過今期幾位前領騎練，冇話邊一路騎練啲馬特別多排到內檔，尤其係韋達，好似同部電腦唔啱咁，係就係多馬騎，但只係得一匹「勁好友」排2檔，餘下好多抽中大外檔，10至12檔總共5匹，死未！？所以，佢今期要追貼柏寶，真係唔容易。

　　好嘞，排位好而又有能力嘅，望落都有唔少馬，如1檔「緣是燦爛」、3檔「應變計劃」和2檔「風之子」。坦白說，可能係亨利主觀意願鍾意咋，因為前兩駒近績真係趕客，1隻連續3場跑十名或以外，另1隻對上兩場唔係尾二就尾三，驚未！？但要知道，「緣是燦爛」分數已經減到過晒籠，落到四班，好似大人同細路玩嘅格局，仲要用到柏寶，不要問，只要信！而「應變計劃」在三班同程如果排到好位，成隻馬叻好多，始終季中133 磅都贏到（當時排1 檔），呢次仲唔使負重，幾着數吓。至於「風之子」，冇咩好挑剔， 轉到1200米，雖則有疑問，外地跑慣跑熟，贏過晒嘅，呢匹一向咁準嘅馬，點會唔勝任。 　

亨利