借題發揮：大摩兩場盃賽叫胡 吼同一世界醉味

魑魅魍魉

　　今季大大小小的盃賽舉行過接近一百項，今日又有兩項上演，就係沙田銀瓶和亞視盃，邊個練馬師最有機會擸晒兩個盃？可能會係大摩都唔定，事關佢向來有盃王之稱，冇耐之前先至捧咗個法國賽馬會盃，再早少少就更加勁，一手攞晒兩項G1女皇盃及冠軍一哩賽，睇佢呢期嘅兵力，唔係冇可能。

　　大摩喺呢兩場盃賽各派3駒出戰，唔知係亨利小心眼，定係過於主觀嘞，總認為主帥騎嗰兩駒唔似有冠軍相，「點心」贏過速度系列次關，但都係上屆嘅事，今季近乎未好過，最叻嗰場已經數到在谷草入Q（8場田草皆冇前五名），而上賽亦唔覺末段好有反抗力，如果突然因地慢變身，咁就認命啦！至於「花好月圓」，剛賽終於上番名，之前有成年幾冇P了，可能係回甦先兆，但要知道隻馬自從年前升到一班之後，上親名都在1800米或以上，所以縮回1600米未必適應得來。

　　比較上，嗰兩場嘅「同一世界」、「新力勁」及「醉味」好似更加有睇頭；「同一世界」去完杜拜一轉，上次復出跑短途錦標唔係冇走勢，輕鬆拍住「鳥語花香」過終點，有番一場實戰重新令狀態躍進，呢次應該仲銳。而「新力勁」，感覺上卡士低多少，不過唔使跑級際賽，避過晒一批老虎如「友誼至上」、「步步穩」等，本身又唔係好重磅，賺點形勢；「醉味」上場明顯拉士幾步騎者動作緊促，呢次換人效果冇理由會差，之前跑級際賽都上得名，今場咁輕磅應好惡。

亨利