借題發揮：3人有3個夢想

魑魅魍魉

　　今晚谷草夜賽，對於3位練馬師嚟講，可以話各有意義，好似姚本輝咁，由佢從練第1W嘅「統帥」，計到啱啱嘅「松風」，呢十幾年已經累積399場頭馬，尚欠1場就湊夠4百大關，雖然數字只係象徵式，冇話有咩特別獎勵，但都係一個新里程。至於李易達，04年「飛躍龍門」係從練第1場勝利，去到上周三「卡加大師」，佢總共贏咗199W，差1場就夠2百場嘞。又睇吓呢兩位練師，喺今期有冇機會展開新的一頁。

　　此外，吳定強馬房今季已經有12W在手，距離上岸仲差1場，幾個月之前，亨利已講過，此廐點會畢唔到業，只係時間上問題啫，難得佢今次忽然派唔少馬上陣，有成7匹咁多，睇嚟好有決心在今晚畢業。

　　坦白說，李易達馬房今次嗰4匹馬比較削，稍為有睇頭已經數到「皇仁俊駒」，冇錯，隻馬谷戰未叻過，上賽後又冇乜點操，表面條件係唔好，但4仗之前在四班同程幾乎有P，睇嚟此程又盲唔晒；今次B欄2檔預咗賺腳程，隔夜十幾廿倍W，真係P可當W賭。至於輝哥方面，「得令先鋒」可以博吓，上場1200 米焗住留後咗，拉士仍有衝勢，嘗試上一哩冇壞，3檔亦配合到隻馬嘅跑法。
　
　　講到加利吳7 隻之中，如「領航動力」、「駿蹄飛」及「喜在心頭」都幾得，當然，前駒9歲嘞，加上5年冇贏過，位望居多，但餘下兩駒近績「骨」，上岸兼起孖，唔係冇可能噃！

亨利