馬主論戰

魑魅魍魉

精算攻略夠惡

　　蔡約翰今晚出馬唔算多，只得兩駒上陣，但都有一定餐士，話唔定又有頭馬進帳。先講尾場「精算攻略」，以往跑過五次谷草一哩，獲得兩冠兩亞，分明係路程專家，今次回師強項路程，即使排外檔兼負重磅都有贏面，咪睇小。

　　另外，第七場「精彩生輝」都有留意值，季內八戰獲一冠四亞兩季一殿，演出夠晒準，上仗響谷草一哩殺入Q腳，證明近期狀態好弗，今次大幅縮程跑 1000米，似乎蔡約翰又想考馬迷膽量，一於捧佢場。

任達華

電訊高星再搏

　　噚日我出席咗LG新手機GD880嘅發布會，傾開先知佢哋老闆Victor原來都好鍾意賽馬，希望日後有機會一齊入場研究吓，響度先祝呢部即將來港嘅手機可以大賣﹗今晚我哋隻「電訊高星」又再上陣，經過上場warm up完之後，我估今次可以跑得好啲，同場對手可以留意埋「寶威威」。

　　另一匹心水係第六場「輕輕鬆鬆」，上仗初出跑谷草1200米，只係以短頭位輸畀對手，證明已經適應晒水土，今次轉配備再跑同程，係時候開齋。

張敬山

鴻霸之星突擊

　　今晚我哋隻「鴻霸之星」又上陣，呢隻馬已經九歲，好難奢求場場都有好演出，不過近兩場都唔係輸得好遠，證明老馬仲有兩腳。今次繼續跑谷草 1200米，再用楊明綸操刀，只係負106磅上陣，希望可以憑住輕磅優勢跑得接近。

　　另外鍾意第六場「開心動力」，以往跑過五次谷草1200米，累積兩冠兩亞一季，擺明路有專長，上次跑沙田落敗唔能夠作準，今次回師強項路程，即刻搵嚟韋達操刀，睇配搭一定搏命，可以作為重心。

梁廷鏘