馮諾嘉手記：家家興旺捧盃 馬會獸醫功勞大

魑魅魍魉

　　剛戰葉楚航憑「家家興旺」爆出二十倍冷W，順利捧走皇太后盃，而且呢場屬於香港三級賽，獎金算豐厚，可謂名利雙收。「家家興旺」終點前力壓打吡預賽冠軍「至勇威龍」，後駒被捧成2.5倍大熱門，而胡森為求配杜利萊上陣，更特意向馬會申請此駒超重三磅 ﹔杜利萊造磅一定要節食減磅，難怪跑畢頭兩場後，見杜利萊有點落晒形，最後險些才能造到磅，也可能因為心急贏馬，轉彎已經開始發力，反而匹「家家興旺」鞍上人鄭雨滇賽前冇乜壓力，只係想着盡力爭取好表現，最後憑頭位壓倒「至勇威龍」贏馬。

　　賽後葉楚航Facebook上恭賀訊息不斷，佢話隻馬季初絞腸痧獲救，要多謝醫生及所有獸醫、同事，加上馬主之一郭素姿嘅支持，不但給予時間讓練者重新訓練，更授權練者作出所有安排及部署，馬主幸運團體終於可繼98年「同興旺」捧走皇太后盃後，相隔12年再憑「家家興旺」捧走此盃，可喜可賀。

期待皆大歡喜開齋

　　幸運團體再捧皇太后盃，馬主可以話期待已久，而「皆大歡喜」贏馬開齋，小妹也等到頸都長。呢匹馬係我舊老闆孫騰章先生名下，很想見到佢拉頭馬，話匹馬冇狀態同質素贏唔到馬倒唔係，近仗狀態一直很弗，連續三場獲亞軍，輸畀「御將軍」、「太陽昇」及「卡加精神」，就係未能順利出頭，前場跑谷草 1200米，終點前只係以個鼻追唔到領放嘅「太陽昇」，「過佢、過佢﹗」該場真係叫破喉嚨。

　　睇番「御將軍」最近三班都入Q，「太陽昇」其後又喺四班同程贏多W，證明「皆大歡喜」質素喺四班一定站得住腳，而且距離出頭時間唔遠，既然近三仗抽中外檔都跑得有聲有色，最好今戰有運抽番好檔喇﹗周三晚我會全力支持，希望係時候贏番場。