曼聯殘陣捱細界

猪拉多纳

曼聯今晚10點喺奧脫福主場對西布朗，本應屬贏波力追前4大好機會，可惜「紅魔」今場陣容超殘，箭頭伊巴謙莫域續停賽，對鋒力造成影響，主Ｗ得1.28倍唔值博，捧中位數2.5球嘅1.93倍入球細較上算。

（Now 623及LeSports HK應用程式周六晚10時直播）
伊巴停賽 影響鋒力

曼聯目前喺聯賽排第5位，落後第4位嘅利物浦4分但踢少兩場，爭入前4唔係奢望。雖然曼聯仲可憑歐霸盃做「跳板」參加來屆歐聯，不過依家只係8強階段，聯賽冇理由咁快放軟手腳。可惜佢哋今場存有隱憂，前鋒伊巴謙莫域及中場安達靴里拉繼續停賽，朗尼、保羅普巴、費蘭尼、菲爾鍾斯及基斯史摩寧都有傷在身，陣容殘到爆，當中伊巴嘅缺陣影響最大，皆因佢就佔咗球隊3成入球，「紅魔」想谷都未必谷得起。

西布朗目前有43分排第8，已達傳統上40分嘅護級安全線，但想攞歐洲賽資格又有段距離，決心未必及主隊，不過西布朗近7次對紅魔取得3勝1和3負，當中3次作客奧脫福贏過兩次，往績唔曳，睇番近4次交手兩隊夾埋入得6粒，以中位數2.5球計更係全部開細，預計今仗唔慌多波入。