皇馬遇神經刀實大鑊

猪拉多纳

3戰失7球 焗攻博翻身

皇家馬德里近期突然跌Watt連輸2仗，今晚西甲返主場迎戰馬拉加，肯定希望踢番場好波重振軍心，不過「銀河艦隊」近期惡戰連場元氣大傷，想大炒對手恐怕有心無力。「神經刀」馬拉加踢法有前冇後，即使作客亦唔會死守求和，製造過多場大手交易賽事，今仗博中位數3.5球入球大最好路。

(Now 632周六晚11時15分直播)

皇家馬德里喺歇冬後硬仗連場，西班牙盃及聯賽3鬥勁旅西維爾，只有1勝1和1負成績，上星期就被西維爾打破聯賽不敗身，周中強陣出擊仲喺主場輸埋畀切爾達。皇馬近3次場波失咗7球，可見後防出現不穩，近期踢3中堅陣式球員明顯適應唔到，連台柱沙治奧拉莫斯都踢到失常，實在令人擔心。
C朗賓施馬入波有保證

雖然後防問題多多，不過皇家馬德里嘅進攻火力點都值得投信心一票，「世界足球先生」C朗拿度同賓施馬繼續拍檔攻堅，級數夠晒保證，而且「銀河艦隊」對上5仗主場聯賽都至少攻入2球，今仗要終止連敗頹勢，喺巴拿貝球場出擊一定會全力數胡。
馬拉加有前冇後唔識守

作客嘅馬拉加近況低迷，對上4仗比賽全部輸晒，雖然球隊實力只屬西甲中游，但佢哋就唔識死，一直貫徹主攻踢法，就連作客比賽都一樣「有前冇後」。馬拉加近5仗作客聯賽入面，有4仗總入球為4球或以上，即使作客馬德里體育會同西維爾都可以入到波，今仗鬥皇馬好可能又係一場入球盛宴。