馮諾嘉手記：包裝猛將有冠軍相

魑魅魍魉

　　趁韋達停賽，今晚柏寶一定會盡情數胡，除咗噚日提過嘅「大進」同「天下寶」可以做膽之外，其餘嘅都要拖腳，例如「勝利雄威」同「華劍寶」，佢今晚手馬咁犀利，難怪隔晚騎師王開售時成為一面倒大熱，排第二嘅馬偉昌都有成十倍，而小妹今次三場精選全部搵柏寶坐騎做膽，希望佢嘅演出醒醒目目。

　　第三場三班1200米，「包裝猛將」上仗增程跑谷草1200米，重配柏寶，結果飛到馬到，熱到得4.1 倍，雖然排大外檔蝕位唔少，但係末段追勢相當犀利，今場又抽到大外檔，形勢冇變，但質新馬開竅隨時再進一步，依然有冠軍相。配腳先揀「多多昇」，季內跑同程兩度奪冠，上仗喺三班跑同程排外檔走蝕位落敗，今場排三檔有利，貼欄守好位可望交出水準。其次係「六六精英」，上場小休復出跑唔擅長嘅泥地賽志在熱身，回師谷草1200米要防。冷腳吼「定做」，上場初出排外檔敗陣，今次初跑谷草抽到黃金一檔，睇佢喺外地用放頭跑法贏馬，今場貼欄放頭跑有權跑入嚟。

成功年代機會重臨

　　第四場四班1200米，「成功年代」季內跑谷草1200米曾喺韋達胯下開齋，其後多番增程無功而回，今場回師贏馬路程，強配柏寶兼有二檔之助，又有機會贏馬，做膽。配腳方面，上場跑第三嘅「厲行星」，連場跑近嘅「神力金剛」，都有權入三甲。冷腳吼季內曾喺同程入位嘅「駿盈」。

　　第七場三班1800米皮亞士紀念盃，柏寶坐騎「智友」最值得睇好，近四仗三度奪冠，愈戰愈勇，上場谷草一哩初戴眼罩走勢更勁，輕易贏對手兩個半馬位，雖然今場初次跑1800米，質新當起，絕對有力應付，當然馬膽。配腳第一匹拖「引伸波幅」，近五仗獲三冠一亞，狀態大勇，今場領放馬唔多，抽到二檔又可以貼欄領放，入三甲冇問題。「星際雄師」上場喺同程爆29 倍冷W，勝後狀態保持，今場強配白德民，排四檔依然值得睇好。「本地實力」最近狀態開始回勇，上場跑第三只係輸半個馬位，今次轉戰贏馬路程，當然要兼顧。