借題發揮：何良呢期夠勁

魑魅魍魉

　　今晚有兩個趨勢值得留意吓，其一，大摩已經連贏8期，仲係周不時起孖嗰隻，呢次有5駒上陣，主帥騎嘅佔大多數，應該唔會得隻「六六精英」啩？尤其啱啱至經過「閒話」的事件！真係希望阿民可以在騎法上連貫多少，既然賽駒要演出連貫，如果唔係，練者有機會被抽秤，但阿民的演出的確令人「目不暇給」，如果馬友們有睇上周日賽事，只能講句：「睇完嚇親，唔信係真！？」嘩，堂堂一級師傅，贏隻「步步穩」盡顯應有的功架，但事隔一場之嘛，騎「閒話一句」完全唔似同一個人，唔通性格分裂！？

　　好多馬友都會話，該場步速快慢，阿民冇理由唔知，點解唔跟前啲，或者早啲發力，呢點亨利已經唔想再斟酌，唯一要講係拉士100米，唔好理隻馬係咪內閃，鞍上人動作已不自然，同時，如果唔係眼花，在那短短100米之內，佢唔只一次望番埋去裏面，係咪望緊「爆冷」唔知，但不免易畀人對號入座囉！

蓋世子牙部署啱數

　　講番今期谷草賽事，何良手馬唔錯，而根據近期谷草佢張成績單，好少會「靜蠅蠅」，點都有啲馬攞出嚟搏。呢次5駒之中，「我跑得」和「祥勝愛駒」好開，唔使點再錦上添花。至於「蓋世子牙」，田草撞完板，返谷中跑一哩兼換人，部署啱數。講到「多贏駒」更像樣，上次強配唔覺幫到手囉（睇番直路點騎就知！），今次賽前試好閘試埋眼罩，仲轉場又肯加程，有得分點解唔博！　

亨利