巴塞細盤愛得過

猪拉多纳

加強防務 犧牲進攻

今晚西甲巴塞隆拿喺主場魯營球場迎戰愛斯賓奴，「地上最強」巴塞現時畀死敵皇馬甩開6分，趁對方踢世冠盃，今仗係拉近雙方差距良機，為完成任務應該穩打穩紮，只求贏波拎3分不求大勝。愛斯賓奴擁有西甲其中一條最堅固防線，到訪魯營勢必死守，中位數3.5球細盤有2倍值得考慮。（Now 632周一凌晨3時45分直播）

巴塞今季踢嚟霸氣欠奉，教練安歷基眼見季初防線勁多甩漏，成日畀對方前鋒予取予攜，所以近期明顯加強防務，近6仗聯賽當中有3仗保持不失，其餘3仗亦只係失咗1球咁大把，穩定性大為改善。不過加強防守嘅代價，就係將以往恐怖嘅進攻火力削弱，王牌「MSN」美斯、蘇亞雷斯同尼馬嘅殺傷力亦大為減少，近6仗聯賽只得1場可以攻入多過2球，而喺呢6仗聯賽當中，總入球均為3球或以下，當中3仗喺魯營球場出戰嘅賽事只入過2球。
愛斯賓奴「神盾級」

愛斯賓奴堪稱係目前西甲防守最出色球隊，對上9仗聯賽竟然多達7場可以保持清白之身，即使作客勁旅馬德里體育會亦能成功悶和0比0，今仗作客魯營球場極大機會沿用死守戰術。愛斯賓奴喺各項賽事已經連續10仗不敗，論狀態同士氣唔差得過巴塞，有望將對手火力減至最低，今場大細中位數調至3.5球，有2倍分頭嘅細盤真係不二之選。