修咸頓捱細界

猪拉多纳

目標唔失波

至於K組尾輪生死戰，英超修咸頓喺主場硬撼以色列球隊比亞斯華夏普爾。雙方現時同分，修咸頓今仗如果輸波，或者以1比1或以上嘅比數和波，都會被淘汰出局，因此必定踢得較保守。比亞斯華夏普爾喺歐霸作客表現麻麻，想急都急唔嚟，中位數2.5球嘅1.8倍細盤值得支持。

（Now 670及Fox Sports Play周五凌晨4時05分直播）

目前呢組榜首捷克球隊布拉格斯巴達已經鎖定首名晉級，剩低1個出線席位，就由今仗兩軍爭逐。由於首循環修咸頓作客悶和比亞斯華夏普爾0比0，如果「聖人」今仗打和0比0，就會因對賽成績相同，而以較佳得失球差出線。倘若以1比1或以上嘅比數和波，比亞斯華夏普爾就會憑較多作客入球而晉級，所以修咸頓今仗唔可能咁大意，自然會以唔失波為首要目標。
比亞斯華夏普爾正宗作客蟲

雖然「聖人」主場踢歐霸有一手，近4次喺自己地頭出戰錄得3勝1和，但今仗首要目標係保住清白之身，加上一對中堅荷西方迪同華基爾雲迪積克表現穩健，應該唔會畀對手咁輕易攞到入球。比亞斯華夏普爾近4仗歐霸作客得1勝3負，好明顯係「客場蟲」，造訪修咸頓相信都會先求穩守再伺機突襲，入波唔慌多，推介中位數2.5球嘅細盤。