紅鑽穩中求勝吼半和

猪拉多纳

主戰鹿角輸0:1都掂

日職王者即將誕生！日職總決賽次回合今日上演，首回合作客領先1比0嘅浦和紅鑽，今仗返主場再鬥鹿島鹿角，只要唔失多過1球就可以順利封王，浦和紅鑽今仗肯定會採取穩中求勝策略，率先做好防守以確保冠軍萬無一失，今仗開出「半場和」機會高唱入雲。

（有線61及201台周六晚6時30分直播）

浦和紅鑽貴為全年總積分第1名，喺總決賽賽制中佔有極大優勢，因為如果兩回合總比數同作客入球都打和嘅話，全年總排名較高球隊將會贏出，意味浦和紅鑽今仗就算輸0:1，亦可以登上冠軍寶座。浦和紅鑽擁有日本最強防線，次階段聯賽17仗只失12球，若決心防守嘅話，要攻破佢哋大門的確唔容易。

事實上，浦和紅鑽首回合領先後，已即時換人轉為防守陣式，明顯係知道有1球在手已經係極大優勢。值得留意嘅係，紅鑽近期多數上半場穩守、下半場先至發力，所以近4仗賽事半場都係以0比0比數結束，而且浦和紅鑽過去5次同鹿島鹿角交鋒，5仗比賽悉數開出「半場和」，可見強敵對壘雙方都唔敢輕舉妄動，上半場先試探對方路數，等下半場先作針對性部署再出擊。
鹿角慢熱急都急唔嚟

鹿島鹿角今仗雖然必須至少攻入2球先有機會封王，但佢哋踢法向來慢熱，欠缺瘋狂搶攻嘅本錢，球隊近9仗賽事只有1仗可以喺上半場入波，近5仗亦有4仗喺上半場同對手踢成0比0。今仗作客面對有大把本錢穩守嘅浦和紅鑽，要喺上半場入波難度極大，半場悶和居多。