榜首3雄開火搶分！超班阿仙奴追打落水貓

猪拉多纳

英超爭標超激爆，領先三雄曼城、阿仙奴、利物浦現時同分，形勢非常緊湊。三軍今晚分途出擊，上演「三重奏」於三個唔同時段登場比賽，唔止想贏，更希望省入多幾球，爭取較佳得失球，搶奪榜首一哥之位，勢必殺個天昏地暗，好戲連場。

今晚英超頭場有氣勢如虹嘅兵工廠，作客魚腩球隊新特蘭，兩隊實力天淵之別！黑貓英聯盃16強賽以0比1不敵修咸頓，領隊莫耶斯不滿球證判決，用粗口鬧第4球證，結果被逐上看台。嘩！咁鬼躁，今晚仲要喺主場迎戰勁旅阿仙奴，莫耶斯要做足心理準備被大炒，唔好輸波發脾氣呀！阿仙奴讓球冇難度，讓球客勝絕對係信心之選！

（Now 621及LeSports HK應用程式周六晚7時30分直播）

講到英超大勇球隊，一定有兵工廠份喇！佢哋呢排好鬼忙，同時應付聯賽、盃賽同埋歐聯3條戰線，但球隊都冇分心！除咗英超開咧戰輸畀利物浦之外，其後13場各項比賽都保持不敗，拎到10勝3和嘅佳績，狀態大勇！雖然球隊傷兵問題嚴重，箭頭韋碧克、新兵盧卡斯佩雷斯、艾卡邦、中場辛迪卡索拉，以及後衞梅迪薩卡齊齊加入十字軍，但都冇影響表現。好消息係兩大主力猛將基奧特同埋艾朗藍斯已傷癒復出，就算狀態未回復十成都夠踢喇，因為今晚對手只係榜尾嘅新特蘭。
新特蘭未開齋兼內訌

另一邊廂，黑貓新特蘭係英超唯一一支仍未開齋嘅球隊，戰績可謂一塌糊塗，開季至今9戰取得2和7負嘅劣績，而且只攻入6球，亦係英超火力最弱嘅隊伍，聯賽榜僅得2分做包尾大幡。就連前鋒迪科爾都指摘自從由莫耶斯領軍後，隊波成績比上季不進反退。就算今晚有主場之利兼且受讓一球都唔睇好呀，心水推介係托弗嘅阿仙奴讓球客勝。