馮諾嘉手記：真奇寶際遇超好

魑魅魍魉

　　未排位時本來睇好第八場三班1200米嘅「開心動力」，點知佢抽排大外檔，機會即時打晒折扣，惟有改用抽到黃金一檔嘅「紅褲子」做膽，呢匹馬季內已經由一班減分落到嚟三班，今次有檔利，隨時發難，「開心動力」變為配腳。

卡加精神黃金機會

　　心水場次第二場四班1200米，馬膽「卡加精神」，今季跑過多場泥地及田草都大敗而回，上場初跑谷草呢程，以97倍大冷跑第二，練馬師葉楚航一向喺谷中嘅成績都特別理想，但估唔到佢轉場即刻大變身，睇嚟呢匹馬非常適應谷草窄場同急彎，趁狀態仲弗，抽埋黃金一檔，係贏馬交代嘅大好機會。配腳第一匹拖「進勝福星」，至今跑過兩場，初出已經被捧成2.6倍大熱，證明幕後信心十足，雖然落第，但熱身後上場即快放贏馬，今場回師谷草跑1200米，同場冇乜快馬，預期會重施故技，三甲應穩。「健威王」跑咗幾場之後，上仗走勢有進，今場初落四班，排二檔唔錯，有分頭不妨兼顧。「皆大歡喜」係小妹前老闆嘅愛駒，所以一直留意住，連續兩場獲亞軍，仲未開齋，馬主好想盡快拉頭馬，但係今次排八檔，對手亦唔弱，拖腳。

　　第四場四班1650米，抽到黃金一檔嘅「兵奇臨」退出，益咗後備補出嘅「真奇寶」，呢匹馬近仗開始跑番近，今場冇乜放頭馬，咁好際遇真係千載難逢，隨時放到贏馬，做膽。配腳先拖上場跑第三嘅「心頭好」，而上場同程跑近嘅「勝任有餘」，仲有連場喺短途賽熱身嘅「回鄉精神」，都可以加入考慮。

　　尾場二班1650米，用「一團威」做膽，呢匹馬近五場戴眼罩跑不勝有位，上場只係僅僅輸畀「安御」，今場排四檔有利，可以補中。配腳方面，「加州滿意」今季贏過谷草1200米，而上場初跑泥地一哩亦得第三，試準中距離實力，回師谷草，拖腳首選。「悅璐孖寶」近三仗獲一冠兩亞，跑第二兩場都輸唔夠一個馬位，今次上二班跑番贏馬路程，應係前列分子。「愛跑得」最近兩場跑第三，賽事水準都好高，拖埋佢。