馬體會唔強求勝利

猪拉多纳

今日中午有1場球會熱身賽，澳職球隊墨爾本勝利對馬德里體育會，今場波喺維多利亞西蒙斯球場，並非勝利慣用嘅主場，但始終屬於澳洲境內，都算有地利，而且勝利日前曾於國冠盃逼和祖雲達斯，韌力十足。馬體會遠道而來，加上試陣為主，戰意唔可靠，捧讓球主勝。

（有線64、203台周日中午12時直播）

今場並唔屬於國冠盃，但墨爾本勝利難得有機會同歐洲一線勁旅交鋒，球員當然要好好把握機會「學嘢」，甚至可以趁機騷哥利，一旦被馬體會教練施蒙尼睇中，隨時可以跟佢去西甲搵食，勝利球員搏殺誘因，明顯高過馬體會。事實上，墨爾本勝利上仗鬥祖雲達斯，即使先落後，但都能夠逼和1比1，最後更憑互射12碼勝出，表現出頑強鬥志。
墨爾本勝利戰意秤先

有上仗「勵志故事」支持下，可增加墨爾本勝利今仗信心。同埋墨爾本勝利早前簽下西班牙後衞阿倫巴路，呢位中堅曾效力奧沙辛拿等多支西班牙球隊，對於祖家球隊馬體會非常熟悉，有佢提供情報，可助隊友布防。

馬體會上仗僅靠中堅高甸入波，1比0小勝熱刺，前鋒費蘭度托利斯踢足全場都冇料到，加上基沙文、恩歷克卡拉斯高、安祖哥利亞、韋圖未歸隊，教練施蒙尼手上前鋒人選好有限。呢位阿根廷名帥講明，熱身賽旨在試陣，所以不值太高估佢哋爭勝決心，隨時上下半場分別以兩批人出戰，讓波有暗湧。