士砵亭大盤有得「芬」

猪拉多纳

鋼門放假「有球必應」

周二凌晨上演一場球會熱身賽，由上屆荷甲冠軍燕豪芬喺瑞士中立場對葡萄牙豪門士砵亭。兩隊今個月都已經分別打咗幾場熱身賽，燕豪芬近兩場對住錫永同聖伊天都能夠贏波，相反士砵亭有幾位歐國盃奪標功臣未歸隊，包括門將魯爾柏迪斯奧，搞到士砵亭近3場失咗9球，可以話中門大開，今仗推介入球大。

（周二凌晨2時30分開賽）

4個喺歐國盃決賽正選上陣嘅士砵亭球員，包括艾迪恩施華、威廉卡維奴、祖奧馬里奧以及門將魯爾柏迪斯奧放假仍未歸隊。特別係門將柏迪斯奧嘅缺陣令士砵亭後防失去支柱，防守力認真麻麻，搞到士砵亭近期熱身賽「有球必應」，對住辛尼特同摩納哥都失4粒，加上球隊6日內已經踢到第4場熱身賽，狀態同體能都未必足。
燕豪芬操起狀態頻入波

燕豪芬開操時間較早，球員喺之前嘅比賽都有唔錯發揮。打咗4場除咗輸畀昆士柏流浪0比1，其餘3場都能夠勝出，證明班球員狀態操得唔錯，今場對住陣容唔完整嘅士砵亭，要入波應該無問題，大盤可期。