洪禮賢講馬：靚好聲出到閘就掂

港陌

　　的而且確韋達自從贏完打吡之後，運勢好番好多，經常都有冠軍騎師該有的風範。來到今期佢又成隊兵排住嚟搏，格局亦似係贏三兩場好正常。熱食嘅馬，希望串埋搵到餐晏吧。

重心場次

第10場  第一班（105-80分）1400米

　　雅雪上仗係咪放唔放都輸，其實係未知之數，事後睇則雖敗不辱，只因頭馬締下今季最快此程時間，那個位置極具指標性﹔今場2檔唔知會點處理，但可肯定德叔因仍未失去策騎權，呢次必會發揮出更佳水準。

　    「安御」由之前受讓前駒8磅，再到今場反讓3磅，計死數幾難反先，當然近兩仗係進步，且看進幅夠唔夠覆蓋那11磅吧。

　    「聖法理」最有機會把前兩駒一舉擊退，跑到夠才加程及轉場，部署穩陣，而在外地曾於此程有高水準演出，上班負115磅，隨時以下犯上。

    　「非我莫屬」上賽有本事由包尾追到入Ｑ，表現比頭馬「又快又勁」仲堅（直路仲要窒過幾次），呢次落入阿柏手中，應會更厲害。後駒向來冇兩鋪，不論入Ｐ還是贏馬後，數據還經歷了３季，似乎不宜追寶尾。「川滙主帥」剛仗明顯跑得唔啱，過早發力以致最後200米唔夠韌，今場換人而磅位太輕，唔敢批死。「正黃旗」如果再收斂多少，隨時贏得。「魄力寶」上賽末段追落唔多，再加磅不易突破。

第1場  第四班（60-40分）1000米

　　出人意表冇一次試閘跑得唔好，又係那類做得妥妥當當先運港嘅馬，１檔係蝕，但信佢有質，初出已買定先。「好快活」跑得啱，根本三班都有得撼，好開冇理由唔追。

    　「雙龍出海」速度可靠，縮回此程唔會有問題。「活力至寶」唔知上賽係因為途中被對手阻upset咗，還是目前進度係咁上下，個人則傾向後者的睇法。「寶再威」今季３場有兩場跑到氣管多血，冇血嗰場就入Ｑ，演出有幾極端可知。「中國心」長期在三班1400米輸近，落班跑直路賽啱，大冷腳。「夢寐以求」上場早段快都唔快，好失望。

第2場  第四班（60-40分）1200米

　　蜚聲初出有本事全程外叠，兼且直路又內閃唔係好騎到劣勢下，尚可有三甲，二三十虛分在手是也。只要今場10檔不致影響太大，贏得。「好利利」係人都知有質，但傷過就係傷過，休出睇吓跑得番幾多。

　    「龍得風雲」上場Ｑ位係賺晒返嚟，好在今次４檔應繼續有形勢。「無敵鷹王」前仗又話痛又話「片」都追得好，睇吓幾時加程便是消案之時﹗「好辣椒」上賽處理唔多好，沿途三至五叠，拉士仍肯撲算叻，換上愛將再跑此程（騎練季內12次合作獲3冠3亞1季3殿），就算11檔也會畀心機跑。

第3場  第三班（80-60分）1000米

　　萬事佳直落3場冇W有Ｑ，直路賽能力有晒證明，無謂挑剔。「金鑽龍華」勝在忠心，分數大致上已摸頂。

    　「聖迪達」３歲仔跑磅階段，突然少負咁多磅仲正，只忌騎練霉緊﹖﹗「尚駿心」落班後優勢唔明顯，１檔唔係好檔，過熱更不值捧，最多拖腳。「大有運」以剛仗係爆缸、氣管多血及放草後首戰，末段識追吓已唔錯，開氣後做得嘢，而重返此程，隔夜十幾廿倍，拖得過。

第4場  第四班（60-40分）1800米

　　壽比南山落班連跑法也轉埋，就算上賽用嚟行頭，也估不到變化可以咁大，姑勿論如何，贏來冇馬可埋到身，以此姿態伸算，上番班都夠爭。「好運得福」不斷轉配件，終在上賽有點追勢（但內閃嚴重），嘗試加程合理。

    　「森林活泉」少數同場季內識贏同程嘅馬，希望步速快啱追。「再度豪情」唞番夠而準備一如上賽前，有理由相信會再搏。「共同努力」及「常山鎮寶」有賠率拖多注。

第5場  第四班（60-40分）1400米

　　靚好聲首戰出閘「好慢」，上場只係「慢」，但明顯早段跟唔住，唔加程唔得，所以轉到1400米應會好，假使出閘反應好，可出頭。「越跑越有」冇痰就有前幾名，評分當然有着數。

　    「福至心靈」剛仗已指出有危險性，而入Ｑ的水準唔錯，可再跟。「覓得寶」上賽唔放也差點有Ｐ，算有些少驚喜，呢次３檔好跑得多。「聚豪精英」及「福將臨門」並無穩定性，買Ｆ才諗。

第6場  第三班（80-60分）1400米

　　好心星與贏上二班「安御」埋Ｑ，而可彈甩「滙名燈」，如交到該有表現，邊有對手可匹敵。「千江映月」加程即勝，難度唔細，贏得險亦要尊重。「特色咖啡」嚴格來說，上賽那個殿軍唔係好養眼，充其量爭腳。「文武精英」唔係長期漏閘，最有機會挑戰「好心星」。「好有勝」和「超力駒」夠冷，可拖一注或有意外收穫。「真奇寶」如場地偏慢，可能憑主動跑法及107磅爭到入前列。

第7場  第二班（100-80分）1800米

　　勇者無敵攞住與「勇敢小子」火併的賽績，在此場點秤都叻啲。「牛精財星」負磅加重，形勢已不如之前兩場着數，加上蔡仔唔係特別夾此駒，頂多位置。

　　「漂亮第一」1800米係佢嘅死路程，檔好和磅頭唔重，唔難爭取成績。「利好」上次臨場觀感仍是差一線，只因以為分利才博定先，而目前82分，或立心等落班。「沙貝利」弗開，加程亦睇唔到有難度。

第8場  本地二級賽 1600米

　　締造美麗點講都係經典一哩賽盟主，卡士在此一啲都唔失禮，由於今場前中段未必會快，更啱發揮，膽材。「勇敢小子」亦係不可多得的好馬，唔使應付長途，跑回合適路程，威力又會重現。

    　「君子一言」剛仗處理上出錯才輸，總之返回中程及換人，應會唔同晒。「步步穩」諗佢放唔放已夠頭痛﹗「閒話一句」此程幾難爆得起。「好先生」忠心到爆，縮程亦冇問題。「勝眼光」地唔快或可偷襲。

第9場  第三班（80-60分）1600米

　　傳奇快車季內長期跑得好，而上賽初跑此程幾乎贏，證明加程後威力更勁，再追。「戶外名駒」上次唔知點爆，但殺得低「歡樂繽紛」真係唔簡單，寶尾都要追。

　    「雨電風雷」加程總比停留喺1400米為佳。「多贏勁駒」上賽已揀，入Ｐ過程掹掹緊，只因直路頭曾受阻，剛呈上升勢頭之馬，今次配強，信得過。「精算攻略」演出向來好，又唔係一定要轉到田草（下周三谷草1650米蔡廐冇馬報），肯換環境應有把握。