廣州死火細盤制得過

猪拉多纳

亞冠盃今晚上演第5輪分組賽，上屆冠軍FC廣州（廣州恒大淘寶）今晚喺H組作客鬥浦項制鐵。FC廣州想出線今仗唔單止要贏波，仲要望同組嘅浦和紅鑽兩場輸晒先有機會晉級，形勢被動。浦項制鐵形勢稍為好少少，不過佢哋向來擅守不擅攻，分組賽4仗只係入得1球，今仗捧細盤啱數。

（now 670周二晚6時30分直播）

衞冕嘅FC廣州4場分組賽只得2和2負，依家喺H組排包尾，只要浦和紅鑽聽日對FC悉尼有分落袋，無論廣州最後兩場贏幾多球都肯定出局，落場抱咩心態真係好難講。就算打真軍，廣州首循環主場對制鐵都係打和0比0，而且今屆兩場作客先後輸畀紅鑽同悉尼，今仗要入波亦唔容易。
飛腳捧大 上海吼細

浦項制鐵比FC廣州多2分、比紅鑽少3分，由於佢哋最後1輪將會作客鬥紅鑽，故此制鐵今場贏波仲有價講，不過佢哋今屆分組賽4場只入1球，入球能力極低，預計雙方都唔會多波入，首選細盤。

另外兩場直播都係G組賽事，頭場大阪飛腳主場鬥水原藍翼（now 672周二晚6時直播），兩軍踢完4輪仲未開齋，今仗和波好大機會攬住一齊出局。飛腳聯賽連盃賽近7仗場場有失波，建議捧大。尾場上海SP（上海上港）主場鬥墨爾本勝利 （now 671周二晚7時30分直播），上海SP今場只要攞1分就肯定出線，墨爾本勝利上周末喺澳職季後賽淘汰圈踢到補時先輸畀布里斯班獅吼1比2，輸體力兼輸士氣，就算想搏亦好難谷得起，捧細盤啱數。