賓菲加主場受讓劏仁

猪拉多纳

另一仗歐聯8強次回合賽事，由德甲班霸拜仁慕尼黑作客鬥葡超勁旅賓菲加。拜仁首回合喺主場只係小勝1比0，晉級仍有變數，相信今仗唔敢輕舉妄動。而且拜仁近年喺歐聯作客表現麻麻，特別係淘汰賽階段已連續6場作客未贏過，既然佢哋今仗和波已經可以晉級，要讓波絕對博唔過，波童今仗寧選有主場之利、戰意十足嘅賓菲加讓球主勝。

（有線62及202台周四凌晨2時45分直播）
拜仁淘汰賽作客難靠

拜仁慕尼黑對上兩屆歐聯雖然都能夠進身4強，但講到淘汰賽作客嘅表現就只屬一般。拜仁最近1次喺兩回合淘汰賽作客贏波，已經係2013/14球季嘅歐聯16強，當時以2比0擊敗阿仙奴，其後6場淘汰賽作客只得3和3負，無論面對今非昔比嘅曼聯、抑或實力次一級嘅薩克達都贏唔到，霸氣欠奉下今仗續有謝路美保定同畢斯杜巴因傷唔踢得，作客讓波始終信唔過。

賓菲加球員質素同實力確實唔及拜仁，不過呢班波勝在有拚勁，就算上仗早段失守亦未有放棄，最終僅負1球保住出線機會，今仗為收復失地勢必搏盡。賓菲加今仗雖有前鋒莊拿斯干卡維斯停賽，門將施薩索拉斯亦因傷缺陣，但佢哋聯賽連盃賽近9仗主場取得8勝1負，而且仲場場都有「士哥」，合計攻入26球，包括喺歐聯16強以1比0擊退辛尼特，今仗主場出擊有力同拜仁周旋到底，賓菲加讓球主勝值得支持。