高清睇跑馬：再跑勝途一定快

纯情小彩迷

　　今季總場次304谷草五班一哩，「贏啲啲」採用留前鬥後戰略，這匹八檔馬很快便切入二叠，拍住貼欄的「進明神駒」留守尾列，但第三段前領馬開始減慢步速，不少騎師即策坐騎上前，然而都爾未見特別進取拉出外叠望空，結果五百米「春秋世代」力弱墮退阻及「贏啲啲」，轉最後彎位牠拉出外檔追趕，但直路初一度被「好利高」封了去路，結果後追不及跑第五，輸給頭馬「全能」個多身位。今戰續配都爾跑同程，排四檔早段應能於內叠慳腳程，轉爭泥地隨時博你唔信，一於選為重心。

　　另外，總場次371田泥三班1200米，「一定快」起步後跟內檔的「自家威」及「兄弟齊心」鬥搶，三駒推騎之際，冷不提防外檔有隻「高飛飛」帶出，「一定快」前速不及只好居於二叠望空﹔過了六百米，「高飛飛」外閃，「一定快」被迫走出三叠蝕位更多，反而「自家威」留守內檔一步不蝕，故此「自家威」跟「一定快」一齊守在前列，但入最後彎位時「自家威」卻可以兩馬位領先，幸好「一定快」鬥心強，轉腳後即交出強勁衝刺，最後收韁贏馬，並在濕慢泥地上跑出一分九秒二四的快時間。今晚排五檔形勢相對較好，氣勢正盛之馬四連捷在望。

Sam