馮嘉諾手記：高智慧形勢一流

纯情小彩迷

　　今日沙田十場賽事，頭場四班1000米雖然唔係新馬賽，但有成六匹PPG初出，當中有啲一出就要留意嘅馬，好似大摩馬房「活力至寶」同葉楚航馬房嘅「漸信良駒」，前駒同父馬如「紅衣司令」係短途好手，短途正宗之外，更加做足工夫而嚟，試過四課大閘，走勢不俗，有權一出即勝。後駒試過兩課大閘，愈跑愈起勁，第二課大閘一鬆韁即衝上跑第二，姿態吸引，呢兩匹初出馬都可以博吓。

　　第五場四班1400米，呢場有唔少後上馬，預計領放嘅「勁有盈」同前置嘅「又贏晒」都排外檔，估計佢哋都會爭取貼欄位置擺前跑，對於排六檔嘅「高智慧」嚟講，均速跑法但賺晒形勢，九歲老馬季內已跑過十二場，其中八次入三甲，演出咁準不妨作膽。配腳方面，「松林之星」上場贏田草1200米後追凌厲，末段仲交出22秒43快時間，拖腳首選。「又贏晒」今場落番四班，韋達未放手，轉呂廐後未交代，咪輕視。「新薪」上場走勢有進，同巫斯義一樣狀態回勇，要兼顧。

　　第七場本地三級賽1800米精英碟，只得八匹參戰馬，睇好評分最高嘅「好先生」，今季雖未贏過馬，但跑六場五度入位，包括四場級際賽，表現絕對唔失禮，難得今場冇馬王級分子喺度，係時候贏番場。配腳先揀「怡勝」，前仗田草1800米差不多同「好先生」一齊過終點，只輸頭馬「好日子」一個頭位，今場跑番呢程，機會又嚟。「鐵拳」季內唯一贏馬嗰次就係跑田草1800米，嗰場以均速制勝，證明夠晒氣量，上場田草1400米開始跑番近，回師贏馬路程要兼顧。「醉味」上仗爭港澳盃得第二，演出不斷進步，初跑1800米亦咪睇小。

紀利威龍有番惡氣

　　第八場一班1200米仁愛堂盃，參戰馬踴躍，較為睇好前仗贏洋紫荊短途錦標嘅「紀利威龍」，上場初遇馬王級強手只跑第五，今次形勢唔同，有番惡氣，可以做膽。配腳先拖「點心」同「火箭動力」，兩匹馬上場都獲亞軍，走勢唔錯。另外，「電光能源」上場泥戰大勝對手成三個幾馬位，跑草地都可作配。