馮諾嘉手記：傾力之城 三班超級

纯情小彩迷

　　剛剛禮拜三晚賽前，品題過前老闆孫騰章先生匹愛駒「皆大歡喜」，之前佢匹團體馬「金好彩」，退役前唯一贏馬嗰次佢中得唔應，所以小妹好想呢匹「皆大歡喜」贏馬之餘，亦為佢贏錢，前仗跑第二走勢好，今場賠率更熱，相信孫生今鋪一定會重注出擊，跑到最後二百米時，匹馬追勢相當勁，一過終點仲以為佢終於贏番場，點知影相後竟然係輸個馬鼻，始終追唔過匹「太陽昇」，真係激氣，多場跑近而未能開齋，真係戥佢唔抵，惟有寄望佢下仗順利打開勝利之門，補番條數。

　　嚟緊周日賽事，頭場四班1200米，鍾意匹「時時攞彩」，呢匹三歲馬晨操走勢不俗，上場已開始追捧，泥地1200米抽得四檔不俗，埋門被捧成4.2倍大熱，結果改用放頭跑法，終於一放到底贏馬，贏亞軍四分三馬位，餘駒完全未能對佢構成威脅，開竅後相信頭馬將陸續有來。

　　「時時攞彩」今場回師田草1200米，雖贏開泥地，但相信呢匹馬唔會只識跑一種場地，乘勇再戰，呢場有多匹只跑過一至三場嘅新馬，狀態仲未到位，對手咁弱，「時時攞彩」連捷並唔出奇，再追捧。

單Q搭明燈

　　第三場三班1200米，睇好「傾力之城」，呢匹馬今季戰績好到不得了，出三場，唔贏都有第二，計埋上季則五戰獲兩冠兩亞，只有一場跑軟地而大敗，可見馬性忠心，只要場地正常，畀佢埋欄放頭跑，十足一隻甩繩馬騮咁，一放難收，例如季內初出嗰場，喺四班跑同程贏對手成兩個馬位，上場由頭放到尾，又一次彈甩亞軍兩個馬位，

　　「傾力之城」上場賽後畀評磅員加咗十二分，但仍然係三班作賽，實力超級，唯一對手應係「明燈」，抽到三檔好跑，但只要「傾力之城」出閘時可以克服十三檔，順利切入內欄，以佢上場嘅贏馬姿態，買W依然可以秤先多少，再單Q搭「明燈」。