馮諾嘉手記： 讓磅賽好日子來臨

纯情小彩迷

　　呢兩日沙田落住雨粉，天氣亦比較潮濕，天文台預計今日多雲同有幾陣雨，相信對場地有多少影響，跑出嘅時間會比較慢，十場泥草混合賽，草地賽採用C欄，今日有雨嘅話，可能對內檔擺前走嘅馬較着數，大家不妨留意下頭幾場後上馬嘅表現再作定案。

永旺財人馬合拍

　　第五場四班1800米草地，用「永旺財」做膽，呢匹馬上場喺梁家偉胯下取得久違嘅頭馬，數上去其實已經兩季未有頭馬進帳，之前多數由鄭雨滇執韁，上場轉吓配搭用梁家偉，用番放頭跑法，反而有新鮮感，以個幾馬位輕勝，原庄人馬乘勇再戰，可冧莊。

　　配腳方面，「鵬力洋洋」近兩仗跑1400同1600米都入位，上場如果唔係出閘碰撞、走外叠兼喺直路上曾受困，相信會跑得更接近，今場初跑1800米，睇腳法應該合適，第一匹拖佢。「福龍」上場以成四個幾馬位喺五班賽大勝，被加成九分咁多，睇上次贏馬姿態，今次回師四班亦要兼顧。「光芒四射」近仗不斷增程，上場初試1800米，雖然落敗但後上試準，再跑呢程唔可以忽視。

　　第六場三班1200米泥地，「一定快」未贏馬之前試過跑田草同谷草，近兩場轉戰泥地表現突飛猛進，後上追勁凌厲，兩次都贏對手超過一個馬位，既然搵到出路，當然想再接再厲，求取三連勝。

　　配腳先揀「自家威」同「高飛飛」，「自家威」抽到一檔，一出閘就可以貼欄領放，而「高飛飛」抽得九檔，相信亦會盡量搶出爭取埋欄，兩匹馬鬥放或會為呢場帶來快步速，估計場地可能對放頭馬有利，兩駒或可爭入三甲。拖多一匹「心歡笑」，泥地1200米路程首本，季內兩場大熱入位，仲未交代，值得重視。

　　至於全日?重點賽事，就係第八場百年紀念盃，呢場本地三級賽跑1800米草地，當中最睇好「好日子」，呢匹馬近三仗一再跑得接近，上場平磅賽只係輸畀三匹高分馬，今場跑番讓磅賽有着數，可贏馬捧盃，作膽。配腳拖八歲老馬「好利威」，近三仗距頭馬唔超過個半馬位，趁有態今場實搏老命。「漂亮第一」上班挑戰負輕磅有利，「爆冷」卡士全場最高，都要兼顧。