馬主論戰

纯情小彩迷

納帕二號夠準

　　  我推介第六場「納帕二號」，呢隻馬先後跑過七場，結果取得三冠兩亞兩季，演出準得交關。雖然今次增程跑2000米，但同父馬之中唔少有長力，兼且有埋個一檔幫手，我睇好佢可以再贏多場。

　　  重頭戲之一嘅百周年紀念短途盃，我鍾意「同一世界」，上場跑香港短途錦標雖然輸咗畀「蓮華生輝」，但其實佢係末段衝得最勁一駒，後勁絕對唔簡單。今次轉爭1000米直路賽，如果白德民立心留後同對手鬥爆一段，話唔定可以捧盃。

梁廷鏘

納柏二號電訊高星要吼

　　  今日我哋隻「電訊高星」有份上陣，雖然近兩場跑田草1600米表現一般，但始終呢隻馬仲後生，應該仍有進步空間。今次排外檔起步要考吓柏威廉騎功，但一定會搏盡，希望跑得好啲喇﹗

　　  另外鍾意第六場「神風先驅」，季內先後響田草1800同2000米贏馬，好明顯係長途材料，所以上場響1600米只跑第三，都唔使太過失望。今次增程跑番贏馬路程2000米，繼續由韋達操刀，排二檔起步啱晒呢隻馬嘅守好位跑法，應該坐位望贏。

張敬山

松林之星補中

　　  告東尼擺咗成手惡馬響度，隨時可以連場數胡，其中第二場「松林之星」就好值得吼實。上場跑田草1200米，終點前幾步走勢好勁，結果追入一席第二，今次再跑同程，用到蘇銘倫操刀，應該可以補中。

　　  另外，重頭戲之一嘅董事盃，告東尼派咗「再領風騷」上陣，呢隻馬上仗捧走華商會盃，蹄下敗將「新力勁」再出再贏，證明八歲馬戰鬥力仍處高峰。上季已經贏過「好爸爸」，級數絕對唔使懷疑，排三檔隨時畀佢一放到底。

任達華