馮諾嘉手記：歡樂繽紛質素高

聪明的白痴

　　徐君禮尿液含違禁物事件近日惹來唔少揣測，小妹唔打算評論呢件事，怕愈描愈黑。不過，徐君禮最近就刪除咗自己Facebook嘅account，事關有唔少傳媒響佢Facebook相簿度download相片發報，佢為咗保障自己嘅私隱就delete咗個account。

　　講番聽日賽事，第二場四班1200米，小妹揀咗「歡樂繽紛」做膽，上季尾響同程一出即勝，質素肯定唔簡單。不過，呢隻馬響暑假期間卻被驗出右前蹄不良於行，結果要休息一輪，等到今戰先作季內復出。睇番「歡樂繽紛」近兩個月曾經先後三度試閘，近兩課走勢仲愈嚟愈吸引，證明健康完全冇問題，再跑贏馬路程可望取得跨季連捷，配腳拖番「松林之星」、「成功網絡」、「時時攞彩」同「聚有盈」。

　　另外，第六場三班2000米，小妹同樣鍾意蔡廐馬，「神風先驅」今季獲得兩冠一季，贏嗰兩場姿態都好輕鬆，上場縮程跑1600米明顯路程嫌短，能夠跑第三已有交代，今場回師贏馬路程可再添進帳。

　　配腳方面，「納帕二號」至今七戰獲三冠兩亞兩季，證明忠心準繩，雖然以往最長只跑至1600米，但睇血統應該有一定長力，而且正值四歲當打之齡，初跑2000米應合發揮，一定要拖。另外，九歲老馬「衝勁直前」亦唔可以睇小，上場跑田草1800米末段後上如箭，難得近期狀態仍可保持，必趁勇再拼。

　　「悅璐孖寶」近兩仗非勝即位，自購馬已正式踏入正軌，上場僅以頭位落敗，轉爭田草2000米亦合發揮，難輕視。「危險英駿」贏過同程，拖埋冇蝕底。