跑道特色：C+3欄利內檔捧華劍寶萬人迷

聪明的白痴

　　【本報資料】今晚谷草賽事採用C+3欄C+6彎，睇番最近一次上年十二月廿三日此欄頭馬紀錄，發現大利內檔馬，當晚八場賽事，七匹頭馬屬五檔或以內馬，唯一例外乃「加州滿意」，但都一早從九檔切入，守二叠跟放下掄元。

　　而從「活威小子」及「威利多多」贏馬更可以得悉後上馬只要守內檔慳位，一樣可以爭勝。前駒該仗爭1650米，憑三檔全程走內叠一步不蝕，最後沿欄後上爆冷﹔後駒該仗1200米慢閘，快放馬本應先機盡失，不過一如「活威小子」般沿途緊守內欄七八位，最後終點前險勝，充分證明C+3欄C+6彎大利內檔馬。

　　頭場五班1650米，「華劍寶」上仗正是於此欄同程不敵「活威小子」，今晚亦一如該仗抽四檔，再加上其跑法主動，形勢十分有利。這匹四歲馬最近成熟進步，近兩戰草地賽均有佳績，大前仗贏1200開齋，上仗再於一哩入Q，質新馬今晚抽內檔大有機會順利補中。

　　仲有第七場三班1000米，「應變計劃」上仗贏馬亦正是C+3欄C+6彎同程賽事，今次再等此欄出賽，應該是悉心部署。此駒上仗贏來姿態從容，難得可以原班再出，加上近三次列陣三班谷草1000米全勝，可見分量十足，今晚有權再下一城。

鋼寶前仗試準

　　另外，第二及四場可留意韋達兩匹一檔馬，「萬人迷」韋達經常摸實唔放手，上仗同程排十檔亦後上如箭跑入殿軍，反映這匹四歲澳洲馬已適應水土，今晚抽一檔估計會守有利包廂位置，有力打開在港勝門﹔至於「鋼寶」前仗谷草C+3欄抽十檔後上第五，證明七歲馬狀態回勇，突然由韋達主轡，來意不善。