好歌四班續可言惡

不死鸟

今周三冇安排賽事，形成有一日空檔給大家回氣，而本周日谷草首次日馬報名表尚未公布，溫故知新下睇回剛周日10場田草賽事馬匹演出作為日後跟進。第一場5班1200米賽事勝出的「好歌」（右圖）最值得留意，此駒上季出賽多次，跑得最好一次在4班田草1000米得第3，負於頭馬「喜萬家」及亞軍馬「果然勁」，該役走勢甚佳，原本以為此役之表現進步，往後可交出頭馬成績，可惜事與願違，連場表現欠佳落敗令人失望。但期後經過練者沈集成悉心找尋其演出失準原因，發覺其喉部有問題，經過手術後恢復正常，而暑期經評磅員減其6分，造就牠可落5班作賽。
「好歌」剛戰季內初出跑田草1200米，沿途走三疊，在直路最後200米時已見韋達鞭騎下以勁勢直奔終點，贏來有餘未盡，此役表現足證健康回復正常後展示威力，預計今仗贏馬後起碼加5分以上，形成下仗在4班作戰，但以其上季在4班負給「喜萬家」得第3表現可印證牠居4班一樣夠實力，開竅後必可扶搖直上，下仗1200或1400米再贏呼聲高唱。
另外一匹要留意係賀賢馬房「喜勁飛」，上季煞科戰以兵不血刃贏1600米，經已顯露實力，而周日跑1400米仍難不倒牠，出閘大半程居後列，入彎前仍處於不利位置，到直路最後300米時候，柏寶移出大外檔展開衝刺，以摧枯拉朽之勢視對手如無物，再次輕易掄元，盡顯王者之風，4歲馬踏入今季更成熟，觀其表現仍大把在手，預計起碼仲有3Ｗ在手，確係值得長線追捧！