紅魔捉狐冇手軟

猪拉多纳

靴里拉白蘭特中場撒網

經過英超開季3場不勝後，曼聯上場終於可以令恥笑佢哋嘅球迷收聲，喺奧脫福大炒昆士柏流浪4蛋，盡顯霸氣，迪馬利亞、戴利白蘭特等一眾新兵大騷哥利，今晚早場作客「狐狸」李斯特城，曼聯讓半一，上盤照追！

（now 621周日晚8時30分直播）

曼聯上場終於可以排出較完整嘅陣容，雖然菲爾鍾斯、基斯史摩寧、卡域克等球員繼續養傷，但迪馬利亞、安達靴里拉、戴利白蘭特、馬高斯盧祖呢幾個新兵終可齊齊上陣，右閘拉菲爾達施華亦傷愈復出，後備更有法卡奧呢個重量級球員坐鎮，令主帥尹戈爾更易作出調動，可以踢番球員最熟悉嘅442陣式。
「舒米仔」剛傷愈 李城等劏

曼聯上場之所以贏得輕鬆，好多人都認為係因為「天使」迪馬利亞大爆發，一手一腳帶領球隊贏波，但其實佢喺地標戰對般尼已盡展級數，上場發威係意料之內，反而科娜認為贏波主因係安達靴里拉同戴利白蘭特呢對中場拍檔，佢兩個都係傳得之人，戴利白蘭特上場處子戰因傳球成功率極高而被譽為「新派路」，助攻又助守。至於靴里拉喺季前熱身賽已經奠定主力位置，其控球技術、傳波視野、控制節奏都係一級水平。「得中場得天下」，曼聯依家有白蘭特同靴里拉喺中路拍住上，再配合「天使」同桑馬達喺前場左穿右插，呢條中場線已經有力「爭天下」﹗

李斯特城可以話係紅魔棄將回收站，迪拿特、真禾特、馬菲占士、湯馬士羅倫斯、丹尼森遜等都係紅魔青年軍出身，但最終都上位失敗，幾經轉折嚟到「狐狸」，但只有迪拿特係球隊必然正選。另外一個同曼聯相當有淵源嘅「狐狸」球員就係傳奇門將舒米高個仔卡斯柏舒米高，可惜呢位「名人之後」啱啱傷愈，狀態令人擔憂，難擋「紅魔鬼」猛列嘅攻勢，一於揀曼聯上盤！