何必貼錢買難受

猪拉多纳

　　好認同日前呂雲峰兄嘅理論，場場都玩，好快離場。彩池五花八門，WPQT以外，又有位置Q、單T、四重彩、四連環，另有三T、六環彩及幾口孖T，一次過全部買齊晒，條數真係好襟計，贏就固然好，但係買得多、買得雜，增加本錢，可能贏完唔夠冚。

　　好多馬迷，一日有幾十個trade，套用投資術語，屬於高頻一族。買飛一大叠，一場馬，先整條wry鐵角，轉頭再買wr對碰W，臨場見某匹馬行圈靚，或者索到料，又動用資金買其他「冧吧」，賽後睇吓叠飛，原來係自己同自己對賭，即係神又係你，鬼又係你。

　　本人唔係吹水，行過投X站，或身處馬場，上述嘅情況經常見得到，呢類馬迷全部突然患上思覺失調，唔係為想贏錢去買馬，原來係為買馬而買馬，衰啲講句，即係貼錢買難受。

　　至於得出結論係乜，精簡好重要，賭得太過雜，抽水都抽乾，與其係咁，賭嚟為乜？期期都要輸，不如食咗佢，至少填飽個肚，而唔係換嚟成肚氣。

　　子樂