阿仙奴誓破錦標荒

猪拉多纳

英格蘭足總盃決戰 追打冇牙老虎

阿仙奴搏盡破錦標荒！今晚英格蘭足總盃王者戰，阿仙奴同侯城會師溫布萊。「兵工廠」今季再與聯賽錦標無緣，足總盃成為「廠仔」破8年錦標荒嘅唯一機會，加上約滿在即嘅雲格去留睇今鋪，將帥眾志成城，對住缺少箭頭謝拉域同沙恩朗變「冇牙老虎」嘅侯城，梗係揀2.12倍「讓球主勝」啦！

（now621、631及635台周日凌晨0:00直播）

英超半程冠軍阿仙奴，之前受傷兵潮同球員狀態跌Watt問題影響，搞到戰績回落，錯過爭霸機會。好在呢啲問題喺季尾都解決晒，除咗中場猛將艾朗藍斯傷愈復出後表現對辦，最後4輪聯賽交出2入球2助攻，「兵工廠」到收爐戰為止更打出一段5連勝氣勢，睇得出士氣同狀態都番晒嚟。
侯城一對前鋒唔踢得

值得留意嘅，係阿仙奴足總盃門將法比安斯基，盛傳今晚會被貶為後備，改由施捷斯尼把關，聽落係陰功，但施捷斯尼今季表現神勇，日前同車路士鋼門施治平分秋色齊奪英超「金手套」，又難怪「一鋪定去留」嘅雲格揀番個穩健程度較高嘅門將嘅。

或者有球迷擔心，8年無冠嘅阿仙奴會好大壓力，之不過咁，侯城創會110年都未贏過重大錦標，今屆首次躋身足總盃決賽，班「老虎仔」隨時仲騰雞啦！更何況相比阿仙奴晉級過程隊隊「硬嘢」，侯城之前嘅足總盃對手，除咗新特蘭叫做同級，其餘米杜士堡、白禮頓、錫菲聯同修安聯全部係低組別隊伍，根本唔可以作準。

再講，自冬季轉會窗加盟侯城後成為鐵膽主力嘅謝拉域同沙恩朗，今季聯賽次循環主場都咬唔入阿仙奴，呢對前鋒今仗仲因為唔符合上陣資格冇得落場，要靠番質素次一級嘅恩歷克沙保、艾奴高孭飛數胡，莫講話搵唔搵到食，佢哋近5場波1和4負勁失13球咁渣，點同阿仙奴鍊呀？