雷神出馬穩佔先機

猪拉多纳

　　今晚8場谷草賽事，原本A欄跑，可以賭得放心，可惜今晚可能有雨，如果落正跑馬地上空，到時場地淋淋，隨時冇得追，又可能一窩蜂後上馬搞掂晒，所以，今晚好唔好賭好視乎個天，若果場地受天雨影響，梗係小注先啦。

　　第一場五班1650米。「穩佔先機」上次跑呢項路程，末段好似飛將軍撲上嚟，睇個勢諗住過梗「領航精神」，點知人算不如天算，就喺終點嗰一步影輸，之前同之後嗰步都係佢贏，呢啲咪運囉！

　　不過咁，證明到呢匹「穩佔先機」嚟到季尾已上火上力，站於勝利邊緣。今次事前唞夠再出，用到雷神，都唔係同你講笑，老苗務求盡早交差。

　　第七場三班1200米。「劍飛聲」演出準到加零一，由田草短途，跑到過嚟谷草，一樣唔甩前幾名，真係值得向呢匹馬致敬。阿蔡目前為咗爭冠軍，呢類馬跑得好哋哋嘅馬，唔會收收埋埋，而賽前特登安排小休，無非係想季尾再搏多一鋪，又難得排到好檔位，既然近兩仗s、d檔都可以跑得咁好，呢場w檔仲唔贏番場。

　　同個夢想谷中霸主

　　第八場二班1200米。「同個夢想」成日陣上都好似陣風咁，末段話過就過，自從轉戰谷草之後，佢嘅表現比田草猶有過之，上場就連強中強「金滿載」都唔係佢嘅手腳，以超強後勁再捷。呢場仍在二班出戰，邊有對手夠佢揮，尾場要搵隻穩穩陣陣嘅馬膽，非佢莫屬。陳華棟