元豐泰用韋達求穩

猪拉多纳

　　今晚8場谷草C欄賽事，賭錢跟紅頂白，上期韋老哥狂風掃落葉，相當之威水，呢期應該要信佢，但又唔可以忽視其他高手，大家都知道目前馬圈形勢緊湊，已經唔再似以前咁嘅環境，有時你威吓，有時我叻啲，所以，千祈唔好顧此失彼。

　　第一場五班1200米。「元豐泰」係阿強爭頭馬重要棋子，時至季末，如果唔好好把握，都幾難湊夠數上岸，之所以，佢唔會再咁慢條斯理，尤其係呢類密密跑得嘅馬。

　　為咗穩陣起見，阿強唔怕熱，「元豐泰」用到韋達，兩倍就兩倍！最緊要係贏得到。講真吖，呢匹馬四班都識上名，五班邊可能唔係大超班，只係睇有冇意思郁手啫。

　　第六場三班1200米。「珍珠有利」之前四班贏兩場，只係贏過「一觸即發」和「仁愛之友」而已，賽績唔講得話好堅，但其中一場造出幾快時間，而且嗰場係負輕磅，末段嘅衝刺勁如炮彈。

　　「珍珠有利」呢次上三班跑，負磅大減，以115磅出戰，一下子孭少咗成15磅，可能識飛都唔定，強而有力嘅後勁，應該會在今場再次顯露，值得優先留意。

　　勁感擅跑一哩

　　第八場三班1650米。「勁感」演出好準，經常走進三甲，好少會跑到烏里單刀，自從轉到此程，三戰未失Q，搖身一變成為一哩好手。

　　此駒今場負重至133磅，唔係唔使擔心，好彩尾場唔係咁多對手，所遇阻力有限，揸嚟做膽應該冇問題。(陳華棟 資深評馬人)